Մի քանի օր առաջ մենք գրել էինք, որ ԱՄՆ-ը արմատապես փոխում է վերաբերմունքը հետխորհրդային տարածքի հանդեպ՝ փորձելով նորից վերակառուցել աշխարհը և Ռուսաստանի հետ հաստատել նոր աշխարհակարգ՝ խաղի նոր կանոններով։ Եվ ահա այսօր հայտնի դարձավ, որ ԱՄՆ նախագահի ազգային անվտանգության գծով նոր խորհրդական Ռոբերտ Օ՛Բրայենը նախօրեին հանդես է եկել անվտանգության հարցերով համաժողովում, որը տեղի էր ունենում կանադական Գալիֆաքսում, և հարցին, թե «հարկավո՞ր է արդյոք, որ ՆԱՏՕ-ն ակտիվանա, որպեսզի պաշտպանի Ուկրաինան ռուսական ագրեսիայից», Օ՛Բրայենը պատասխանել է. «Չեմ կարծում, թե ՆԱՏՕ-ի համար ընդհանուր առմամբ գրավիչ կլիներ Ուկրաինան ընդունել և ուղղակի կոնֆլիկտի մեջ մտնել Ռուսաստանի հետ»։

Ասված է կարճ, բայց միանշանակ։ ՆԱՏՕ հրաժարումն իր շարքերում Ուկրաինան ընդունելուց չի կարող իր հետևից առաջ չբերել ԱՄՆ լրիվ հրաժարումն Ուկրաինայից, քանզի իմաստ չունի ջանքեր թափել՝ ազդեցության հասնելու համար որևէ տեղում՝ առանց հեռանկարի և առավել ևս՝ վերահսկողություն սահմանելու մտադրության։ Հետևաբար, Ուկրաինայի արևմտականները շուտով ողբերգություն կապրեն։ Տեսնենք, թե ինչպես կհարմարվեն նրանք նոր իրողություններին նոր աշխարհում։