Շենգավիթի վարչական շրջանի դատարանում այսօր շարունակվում է Ռոբերտ Քոչարյանի և մյուսների դատավարությունը: Գործող անձինք նույնն են՝ օրիորդ Դանիբեկյան Աննան Փաշինյան Նիկոլի սրտի դատավորի դերում, Ռոբերտ Քոչարյանը՝ գլխավոր մեղադրյալ, սահմանադրական կարգի տապալման մասնագետներ Սեյրան Օհանյանն ու Յուրի Խաչատուրովը, սահմանադրական կարգի տապալման օժանդակելու և ապօրինի գույքի օրինականացման լուրջ պրոֆեսիոնալ Արմեն Գևորգյանը: Օրիորդ դատավոր Աննային ինքնաբացարկի միջնորդություն են ներայացրել, սակայն այն չի բավարարվի, քանզի Դանիբեկյան Աննան դարձել է Փաշինյան Նիկոլի սրտի և մյուս բոլոր ներքին օրգանների դատավոր, նշանակում է՝ նա անփոխարինելի է:

Այս կրկեսին մասնակցելը այլևս պատիվ չի բերում երկրորդ նախագահին, մանավանդ Սահմանադրական դատարանի որոշումը չկատարելուց հետո: Միակ ճիշտ որոշումն այսօր դատաքննության բոյկոտն է: Ռոբերտ Քոչարյանն ու իր պաշտպանները պետք է հրաժարվեն այս պրոցեսից, արհամարհեն այս դատաքննությունը: Թող օրիորդ Աննան գա ու մենության մեջ անցկացնի իր դատական նիստերը, ինքն իրեն հարցեր տա ու պատասխանի: Ամեն դեպքում, պետք է գիտակցել, որ դատավճիռը որոշված է, Քոչարյանը պետք է դատապարտվի, հետևաբար, Քոչարյանի մասնակցությունն ու պաշտպանվելը այլևս ծիծաղելի են դառնում: Փաստորեն, Քոչարյանը կամավոր խայտառակ ներկայացման մեջ դեր է խաղում, որտեղ որոշված է նրա ավարտը: Բացի այդ, Քոչարյանը բազմիցս հայտարարել է, որ մեղադրանքն ու ընդհանրապես դատաքննությունն անօրինական են, և այս հանգամանքը նույնպես անհասկանալի է դարձնում նրա կամավոր մասնակցությունը:

Կարծում ենք, դատաքննությունից հրաժարվելու և այն բոյկոտելուց լավ ու ռացիոնալ ելք չկա և չի կարող լինել այս իրավիճակում: Դա չի նշանակում պայքարից հրաժարվել՝ դա նշանակում է պայքար ապօրինի դատարանից դուրս: Թող Քոչարյանին դատեն ու դատապարտեն առանց նրա մասնակցության և դատավճիռն օրինական ուժի մեջ մտցնեն: Ուշ թե շուտ բոլորը պատժվելու են, իսկ ճաղերի հետևում ժամանակ կունենան մտածելու ամերիկյան դեսպանի հրահանգների կատարման ծանր հետևանքների մասին:

Աղբյուրը՝ Artiom Khachaturian