Միրզո Արարատյան

Հայտնի հեռուստաբանավեճի ընթացքում Ծառուկյան Գագիկը փաստացի բացահայտել էր Մարուքյան էդմոնին՝ ասելով վերջինիս հովանավորների մասին: Չնայած անուններ չտրվեցին, իսկ Մարուքյան Էդմոնն ասաց, որ իր հովանավորը ժողովուրդն է, քչերը դրան հավատացին: Թերևս, սա է պատճառը, որ խնդիրը բաց մնաց, և այսօր Մարուքյան Էդմոնը կրկին արդարանում էր: Որպես արդարացում սա պատմեց իր անիմաստ կյանքից մի հատված:

Մարուքյան Էդմոնն ասում է. «2012թ. ընտրությունների ժամանակ տարբեր քաղաքական ուժերից մարդիկ գալիս էին և ասում էին՝ արի գնանք մեր առաջնորդին հանդիպենք, որ քո համար լավ լինի: Մի ուժ էլ ԲՀԿ-ն էր բնականաբար, այն ժամանակ կոալիցիոն ուժ էր, կոալիցիոն թեկնածուն Վիկտոր Դալլաքյանն էր, և ես որևէ ուժի հետ մերժել եմ հանդիպումները: Գևորգը «բարեց» ա, սպորտսմեն տղա ա, իրար հետ ենք ծառայել: Ինքը ինձ երկու անգամ առաջարկել է հանդիպել Ծառուկյանի հետ՝ և՛ ընտրությունների ընթացքում, և՛ ընտրություններից հետո, երկու անգամ էլ մերժել եմ: Ընտրություններից հետո էլ ասեցի՝ արդեն որ ընտրվել եմ, իմաստ չկա, խորհրդարանում կհանդիպենք, ի՞նչ խնդիր կա: Վիկտոր Դալլաքյանը վիճարկում էր իմ գրանցումը և ընտրությունների արդյունքները: Տարբեր քաղաքական ուժերից առաջարկում էին մտնել իրենց քաղաքական միավոր,այդ թվում՝ ՀՀԿ-ն, իրենք ինձ կպաշտպանեին: Ես ասել եմ՝ խնդիր չկա, անվավեր ճանաչեք ընտրությունները, ես հոկտեմբերին Վանաձորի քաղաքապետ կընտրվեմ: Բողոքարկումները եղել են, մերժվել է: Առաջին անգամ Ծառուկյանին հանդիպել եմ ԱՄՆ դեսպանատանը մի հավաքի ժամանակ՝ ընտրություններից հետո: Ինձ Ծառուկյանի հետ ծանոթացրել է Խաչիկը Գալստյան՝ Ծառուկյանի մամուլի քարտուղարը, որի ժամանակ Ծառուկյանն ասաց՝ Վիկտոր Դալլաքյանը տեսա՞ր ոնց խայտառակ եղավ, իշխանության մեջ մտավ… ուզում էր ասել՝ հանկարծ դու էլ էդպես չանես, չես ուզում գաս մեր հետ… Ես ասացի, որ ես ունեմ կորցնելու մի բան՝ իմ անունն է, ու իմ անունը չեմ կարող կասկածի տակ դնել, ու ես գնացի մտա անկախ պատգամավոր, ոչ ՀՀԿ, ոչ ԲՀԿ, ոչ մի քաղաքական ուժի մեջ չմտա»: Մարուքյան Էդմոնը վստահեցրեց նաև, որ Ծառուկյանն այլ բան չի կարող ասել, ու վախենալու բան էլ չկա:

Սա, ինչպես ասացինք, Մարուքյան Էդմոնի անիմաստ կյանքից մի հատված էր, որը լի էր հակասություններով: Մենք դրանք հայտնաբերեցինք, սակայն չենք ցանկանում սևեռվել դրանց վրա: Կներկայացնենք դրանցից մի քանիսը:

1. Եթե կար կոալիցիա և այն ուներ թեկնածու, ապա ինչո՞ւ կոալիցիան պետք է, ի դեմս Մարուքյան Էդմոնի, ևս մի թեկանծու ցանկանար ունենալ:
2. Եթե Մարուքյան Էդմոնն արդար էր ընտրվել, ապա ինչո՞ւ էր այդքան հեշտ համաձայնում անվավեր ճանաչել ընտրությունները:
3. Եթե Մարուքյան Էդմոնը որևէ քաղաքական ուժի հետ բանակցությունների մեջ չի մտել, ապա ի՞նչ գիտի, թե նրան ով և ինչ է առաջարկել:
4. Եթե Ծառուկյան Գագիկը իշխող կոալիցիայի մեջ է եղել, ապա ինչո՞ւ էր նա խայտառակություն համարում Դալլաքյան Վիկտորի իշխանության մեջ մտնելը, մանավանդ որ վերջինս, ըստ Մարուքյան Էդմոնի, ի սկզբանե կոալիցիոն թեկնածու էր:
5. Ինչպե՞ս են մտնում անկախ պատգամավոր:

Իհարկե, մենք կարող ենք այս ամենը թողնել առանց մեկնաբանության: Ամեն ինչ շատ պարզ է: Սակայն մի խորհուրդ տանք Մարուքյան Էդմոնին: Բացահայտվիր, լուսավորիր մեզ, որպեսզի հասկանանք, թե ով ես դու: Այդպես երկար ապրել չես կարողանա: Բացի այդ, տարիքդ էլ այն չէ: Մեծանում ես: Էլ առաջվանը չես: Խոստովանիր, քանի դեռ ուշ չէ: