Լուսավոր Մարուքյան Էդմոնը սկսել է կանխագուշակություններով զբաղվել: Նրա կարծիքով, այս անգամ ընտրություններին քաղաքացիների մասնակցությունը բարձր կլինի:

«Եթե 1,5 տարի առաջ ԱԺ ընտրություններում մասնակցությունը 1,5 մլն է եղել, այս անգամ ակնկալում եմ, որ մինչև 1,3 մլն հազար մասնակցություն, որովհետև մարդիկ հակված են և ուզում են շատ ակտիվ մասնակցել և պաշտպանել երկրում տեղի ունեցած փոփոխությունները: Մարդիկ էդ դեբատները տեսնում են, վախեցած են, ասում են՝ կարո՞ղ է դրանք հետ գան: Հաջորդ հանգամանքն այն է, որ ռեյտինգայիններն իրենց ընտրողներին բերելու են»,-ասել է Մարուքյան Էդմոնը:

Թե ինչքան մարդ է գալու ընտրության՝ մեզ համար կարևոր չէ: Մեզ համար ավելի կարևորը ապագա պատգամավորների բարոյական և ինտելեկտուալ կերպարն է: Ընտրակեղծարար Մարուքյան Էդմոնի բարոյական կերպարի մասին խոսելն ավելորդ է, քանզի մենք դրան բազմիցս անդրադարձել ենք: Հիմա` ինտելեկտի մասին: Մարուքյան Էդմոնն ասում է, որ այս ընտրություններին մասնակցությունը բարձր կլինի՝ 1.3 մլն: Նա չի նշում բարձր լինելու չափորոշիչները, սակայն, որպես համեմատելի օրինակ, ներկայացնում է 2017թ. ապրիլի 2-ին կայացած ՀՀ ԱԺ ընտրություններին մասնակցած քաղաքացիների թվաբանական արտահայտությունը՝ 1.5 մլն ընտրող: Ստացվում է, որ Մարուքյան Էդմոնի համար 1.3-ը ավելի բարձր է, քան 1.5-ը: Այսօրինակ պատգամավոր ունենալը ռիսկային է, քանզի Ազգային ժողովում տարրական թվաբանություն իմանալն, այնուամենայնիվ, անհրաժեշտ է: