ՀՀ ԱԱԾ-ն հերթական հայտարարությունը տարածեց: Այս անգամ հերթը հասավ «Հայոց Արծիվներ. Միասնական Հայաստան» կուսակցության փոխնախագահ, «Haynews.am» լրատվական կայքի պատասխանատու Մհեր Եղիազարյանին, որն ըստ ԱԱԾ վարկածի` խաբեությամբ ուրիշի գույքի հափշտակություն կատարելու դիտավորությամբ, 2014թ. փետրվարից մինչեւ 2018թ. հոկտեմբերն ընկած ժամանակահատվածում, անձամբ կամ միջնորդների միջոցով, չարաշահելով ՀՀ մի շարք քաղաքացիների, այդ թվում` առանձին զինծառայողների վստահությունը, ծառայության կամ աշխատանքի տեղավորելու, ծառայողական առաջխաղացման կամ այլ տարաբնույթ հարցեր լուծելու համար, կաշառք տալու պատրվակով նրանցից պահանջել, ստացել և առանց որևէ գործողություն կատարելու խարդախությամբ հափշտակել է 180 հազար դրամից մինչև առանձնապես խոշոր չափերի հասնող 10 հազար ԱՄՆ դոլարին համարժեք 4 մլն 775 հազար ՀՀ դրամ: Մհեր Եղիազարյանը ձերբակալվել է, կատարվում է նախաքննություն: Բացի այդ, ՀՀ ԱԱԾ-ն հաղորդում է, որ այն քաղաքացիները, ովքեր տուժել են Մհեր Եղիազարյանի նմանօրինակ գործողություններից, խնդրվում են դիմել ՀՀ ազգային անվտանգության ծառայություն: Տրված է նաև այն հեռախոսահամարը, որով ՀՀ ազնիվ քաղաքացիները կարող են տեղեկություններ հաղորդել սրա մասին:

Այն, որ ՙՀայոց Արծիվներ՚ կուսակցությունը խայտառակ կազմակերպություն է, պարզ է: Մենք բազմիցս անդրադարձել ենք այս կազմակերպության առաջնորդ Ասրյան Խաչիկի խայտառակ կերպարին, թեպետ պետք է խոստովանել, որ այսօրվա լակոտակրատիայի ֆոնի վրա Ասրյան Խաչիկն իր արծիվների հետ միասին մեր աչքին հրեշտակ է երևում: Խնդիրն այլ է. անկախ մեր վերաբերմունքից այս կամ այն գործչի հանդեպ, մենք դեմ ենք քաղաքական հալածանքներին: Իսկ ԱԱԾ այս գործողությունը, մեր կարծիքով, քաղաքական ենթատեքստ ունի, քանի որ նախընտրական շրջանում ձեռբակալվում է քաղաքական կուսակցության ներկայացուցիչ, որը նաև, «Haynews.am» լրատվական կայքի պատասխանատուն է: Մեր տարակուսանքը հայտնելով ԱԱԾ այդօրինակ գործունեությանը, պահանջում ենք քաղաքական գործչի և լրագրողի նկատմամբ քրեական հետապնդման անհապաղ դադարեցում: Միաժամանակ նշում ենք, որ այս խնդիրը լինելու է մեր ուշադրության կենտրոնում, քանզի թե ԱԱԾ-ի , թե ՙՀայոց Արծիվներ՚ կուսակցության ղեկավարները մեր լավ հաճախորդներն են, որոնք շատ թանկ են մեզ համար: Այդ իսկ պատճառով էլ մեր և վերջիններիս արդյունավետ գործունեությունն ապահովելու համար կցանկանայինք, որ մեր հաճախորդները ապրեն հաշտ ու համերաշխ: