Եթե ինչ-որ մեկը թալանել է, ապա դա չի նշանակում, որ նա պետք է կալանավորված լինի: Եթե վերջինս կալանավորված չէ, ապա նա պետք է վերադարձնի թալանվածը: Եթե նա վերադարձնի թալանվածը, ապա դա չի նշանակում, որ վերադարձվածը վերջինիս կողմից ամբողջ թալանվածն է: Ամեն դեպքում, պարզ չէ, թե արդյոք թալանողը չպետք է ենթարկվի քրեաիրավական ներգործության: Ահա այսպիսի բարդ տրամաբանական և մեզ համար անհասկանալի եզրահանգումներ է անում Փաշինյան Նիկոլը:

Ըստ Փաշինյան Նիկոլի`«Շատ կարևոր է, որ կարողանանք գնահատել, թե որքան գումար է գողացվել և որքան պետք է վերադարձվի: Սա հեշտ աշխատանք չէ: Չափազանց կարևոր է, որ որևէ մեկը քրեական հետապնդման չենթարկվի չհիմնավորված: Նոր ԱԺ-ն կարող են լինել օրենսդրական փոփոխություններ, կարող է անցումային արդարադատության որոշակի տարրեր ներդնենք: Մենք պետք է մշակենք պատրաստ բանաձևեր, ենթադրենք, առանց որևէ քրգործի հարուցման, որովհետև քրգործը հարուցվում է կոնկրետ դեպքերով: Ասենք, մեկը ներկայանում է քննչական մարմիններին ու հայտարարում, որ էսքան չարաշահում եմ թույլ տվել, գողացել եմ այսքան գումար, այսքան գումար պատրաստ եմ վերադարձնել: Նման դեպքերում ի՞նչ ենք անում: Այս հարցը պետք է քննարկենք առաջիկա Ազգային ժողովում: Մի կողմից, հանրությունը մեր առջև պահանջ է դնում, որ մենք արդյունավետ լինենք կոռուպցիայի դեմ պայքարում, մյուս կողմից, իրավական ընթացակարգերը թույլ չեն տալիս, որ լինենք բավարար չափով արագ»:

Դե ինչ, ապագա ԱԺ-ն Փաշինյան Նիկոլը ցանկանում է վերածել գողական սխոդկաների գումարման օբյեկտի: Եվ այդ պարագայում մենք ականատես կլինենք շատ ուշագրավ իրադարձությունների: Օրինակ, հնարավոր է, որ ԱԺ քննարկմանն արժանանա մի դեպք, երբ որևէ համատիրության աշխատակից ներկայացնի իր թալանածի թվաբանական արտահայտությունը, իսկ իրավապահները ողջամիտ կասկած ունենան այդ թվի վրա: Այդ դեպքում, ըստ Փաշինյան Նիկոլի, խնդիրը տեղափոխվում է ԱԺ և, հետևաբար, համատիրության աշխատակցի թալանածի թվաբանական արտահայտությունը պետք է պարզեն ԱԺ պատգամավորները, ասենք, սիմոնյան ալենը, նազարյան լենան և այլք: Դա վատ ձևաչափ չէ: Սակայն, մինչև դրան անցնելը, ՀՀ ԱԺ ապագա պատգամավորներին պետք է գողի կարգավիճակ շնորհել, ինչպեսև մենք առաջարկել ենք դեռ տարիներ առաջ: