Նախընտրական փուլում ամենամեծ դերը վերապահված է ԱԱԾ-ին: Այս կառույցը վերջին շրջանում շատ է ակտիվացել: Հետո կրկին պասիվանալու է: Վստահ ենք:

Ուրեմն, ԱԱԾ-ն պարզել է, որ «Երևանի Կոմիտասի անվան պետական կոնսերվատորիա» ՊՈԱԿ-ի Գյումրիի մասնաճյուղի տնօրենը կազմակերպությանը հատկացված միջոցներից 2012-2017 թվականների ընթացքում շուրջ 121 մլն ՀՀ դրամ է փոխանցել իր իսկ ղեկավարած հասարակական կազմակերպությանը, որից հետո գումարը յուրացվել է: Բացի այդ, փառատոնի անցկացման նպատակով միջազգային հիմնադրամի կողմից իր ղեկավարած նույն հասարակական կազմակերպությանը 2015 թվականին հատկացված գումարներից յուրացրել է ևս 3.000.000 ՌԴ ռուբլի՝ կեղծ հաշիվ-ապրանքագրերի հիման վրա ձևակերպելով, թե իբր այն ծախսվել է փառատոնի մասնակիցներին հյուրանոցներում կեցությամբ ապահովելու համար:

Ի՞նչ է ստացվում: Ստացվում է, որ 2012-2017թթ. մեր երկրում ԱԱԾ չկար: Դա մեկ վարկած: Մյուս՝ ավելի հավանական վարկածի համաձայն, ԱԱԾ, այնուամենայնիվ, կար, սակայն հանդիսանում էր զուտ տեղեկությություն հավաքող հիմնարկ: Սրանք միայն տեղեկություններ էին հավաքում` դրանք ինչ-որ ժամանակ օգտագործելու համար: Այդ ժամանակը եկավ: Փաշինյան Նիկոլի կառավարությունն ԱԱԾ արխիվները սկսեց օգտագործել նախընտրական դիվիդենդներ շահելու նպատակով: Հաշվարկը պարզ է. տեսեք, թե ինչպես ենք պայքարում կոռուպցիայի դեմ: Որպես թիրախ, սովորաբար, ընտրվում են միջինից ցածր տրամաչափի անձինք: Սրանց կձեռբակալեն, այնուհետև բաց կթողնեն: Համ էլ այս ընթացքում համաներում է հայտարարվել: Արդյունքում թատրոնի նման մի բան է ստացվում: Սա է Փաշինյան Նիկոլի ոճը:

Սակայն իշխանությունները հաշվի չեն առել այն, որ ԿԳԲ-ի հետ նույն թիմում խաղալը բարդ գործ է: Ինչպես նշեցինք, ԿԳԲ-ն միշտ հանդիսացել է տեղեկություններ հավաքող հիմնարկ: Ով էլ լինի իշխանություն՝ կապ չունի, ԿԳԲ-ն միշտ և բոլորի մասին տեղեկությունների տնօրինող է: Մեր կարծիքով, հենց դրանից պետք է զգուշանա Փաշինյան Նիկոլը, քանզի նրա մասին տեղեկությունն ամենաարժեքավորներից է: Միգուցե նաև շատ շուտով այդ տեղեկությունները հանրային դառնան: Համենայնդեպս, մենք դրան սպասում ենք: