Արտյոմ Խաչատրյան

Փաշինյան Նիկոլին հետևելիս կարելի է գալ այն եզրահանգման, որ սա ծնվել և մեծացել է ոչ թե Իջևանում ու Երևանում, այլ Գյումրիի Սլաբոդկա թաղամասում և եղել է Քոռ Կոլայի` նախկին քաղաքապետ Վարդանիկի հոր սանը: Քանզի ժողովրդի վարչապետը գողական է գնում մի այլ ձևի, առավոտից իրիկուն, ամեն առիթով. սարսափեցնում է մարդկանց ասֆալտով, պատեպատ տալով, նստեցնելով, դեռ վարչապետ չէր, բայց արդեն խեղճ Շմայսի գլուն էր խուզում և այլն: Սա` իմիջիայլոց:

Այժմ` ըստ էության:

Երեկվա իր եթերում Փաշինյան Նիկոլը, անդրադառնալով միքայելյան սասունի կողմից հակազգային գաղափարի հնչեցմանը, տառացիորեն սպառնաց հանրապետականներին: Ակնարկեց ներկա և ապագա քրեական գործերի մասին՝ դիմելով գործող սպաներին (հավանաբար, Վիտալի Բալասանյանին), ասաց՝ տեղներդ վեր ընկեք, քիթներդ չխոթեք քաղաքականության մեջ և այլն: Նույն հռետորաբանությունն այսօր Սպիտակում տեսանք: Սա արտառոց երևույթ էր:

Բանն այն է, որ Փաշինյան Նիկոլն իսպառ չունի պատասխանատվության և մեղքի զգացում: Փոխանակ լռեր, ընդհանրապես անտեսեր այդ ստորությունը և ներողություն խնդրեր, նա դիմեց հարձակման` իրեն համարելով ճշմարտության վերջին ատյան: Լենինականում այս դեպքերում ասում էին` տռեմ ես, դմփեմ ես: Սա անբարոյականություն է: Եթե մարդն ի վիճակի չէ իր մեղքն ընդունելու, ապա գոնե պիտի խելոք տեղը վեր ընկնի և չդմփի:

Հանրապետականների ցուցակն այս անգամ հաջող է, կան լուրջ ինտելեկտուալ ու խարիզմատիկ անձնավորություններ: Ինչո՞ւ սրանք չեն հետևում ժողովրդի վարչապետի օրինակին: Օրինակ, ես Շարմազանովի տեղը ուղիղ եթերում կասեի. «Պրն Փաշինյան Նիկոլ, դու պատասխան ես տալու ամեն ինչի համար քրեական օրենսգրքով նախատեսված հոդվածներով: Դու պիտի պատժվես երեխաներին բարիկադներ հանելու համար, դու անպայման կպատժվես Ազգային ժողովի հանդեպ բռնություն կիրառելու համար, դու կենթարկվես քրեական պատասխանատվության տասնյակ դատավորներին բռնանալու համար, ինչի շնորհիվ էսօր Հայաստանում «Հըզբոլլահ» ունենք, դու անպայման կնստես երկրորդ նախագահի և ՀԱՊԿ գլխավոր քարտուղարի գործերով դատարաններին որոշում թելադրելու համար, դու պատասխանատու ես քո լակոտակրատիայի թալանածի համար և այլն…»։

Իհարկե, այս ամենն իրականություն կդառնա, սակայն այսօր, ընտրարշավի ժամանակ այս մասին խոսելն, ի պատասխան Փաշինյան Նիկոլի նագլիության, անհրաժեշտ է: Վաղը ոնց էլ լինի՝ էդ դատավորներին կհարցեն, չէ՞, թե` այ տղա, էդ դու որ օրվանից դարձար տեռորասեր, էդ դու ո՞նց փակեցիր երկրորդ նախագահին, որն իմունիտետ ունի՝ ըստ սահմանադրության: Եվ ի՞նչ կասեն դատավորները: Բնականաբար, դրանցից և ոչ մեկը չի ցանկանա էշ նահատակ դառնալ հանուն Փաշինյան Նիկոլի: Իսկ այս հարցադրումների արդյունքն էլ, կարծում եմ, շատ հստակ է:

Փաշինյան Նիկոլը պիտի ենթարկվի ամենախիստ քրեական պատժի, և նա գիտի այս մասին, դրա համար իշխանությունը նրա համար միակ փրկիչ օղակն է: Նա արդեն ունի պատկառելի քրեական անցյալ, այնպես որ երկրորդ ժամկետը հեշտ կտանի: Պետք է հենց այսօրվանից խոսել ժողովրդի վարչապետի ողբալի ապագայի մասին և, ինչու չէ, նաև մատ թափ տալ նրա վրա: Հակառակորդի դեմ երբեմն անհրաժեշտ է պայքարել իր իսկ մեթոդներվ: Տեսնենք` կֆայմե՞ն արդյոք հանրապետականները քարոզարշավի ընթացքում Փաշինյան Նիկոլին արժանացնել հանրային դատապարտման: