Ամենայն հավանականությամբ, Փաշինյան Նիկոլը փոխել է գործունեության մարտավարությունը: Եվ եթե մեկ-երկու ամիս առաջ նա կոչ էր անում ասֆալտին փռելով խնդիրները լուծել, ապա այժմ պատրաստվում է, ասֆալտի փոխարեն, հանցագործների հարցերը լուծել սեղանների և մահճակալների տակ: 

Դիմելով ՀՀԿ-ականներին՝ Փաշինյան Նիկոլն ասել է. «Դուք ծախել եք ՀՀ քաղաքացու արժանապատվությունը և ձեզ համար «Բրաբուսներ» եք առել: Հիմա պետք է ծախեք ձեր «Բրաբուսները», որ վերադարձնեք ժողովրդից գողացվածը: Հիմա էլ մարդիկ են դուրս եկել, ասում են՝ վարչապետ, էդպես չեն աշխատում, ուրիշ ձև են աշխատում: Ասում են՝ վարչապետը չպիտի սենց անի, վարչապետի ռոժը չպիտի սենց լինի: Դա ինձ ծանոթ բան է: Երբ ես ուսանող էի, ինձ ասում էին՝ ուսանողը սենց չի լինում: Երբ լրագրող դարձա, ինձ ասում էին՝ լրագրողը սենց չպիտի լինի: Հետո երբ պատգամավոր դարձա, ասում էին՝ պատգամավորը տենց չպիտի լինի, հետո երբ բանտ նստեցի, ասում էին՝ տենց բանտ չեն նստում, սենց են նստում: Հետո ասում էին՝ հեղափոխությունը տենց չեն անում, սենց են անում: Բա Սորոսի դաբրոն ունե՞ք, բա իշխանությունների հետ խոսացե՞լ եք, պայմանավորվե՞լ եք: Ասում էին՝ եթե ասում եք՝ բաց ձեռքերով ենք հեղափոխություն անում, ուրեմն դուք ծախված եք»։ Հետո հավելել է, որ իրենց ոչ մեկի «դաբրոն» պետք չի եղել հեղափոխություն անելու համար, բացի ժողովրդից։

Խոսելով սեղանների և մահճակալների, ըստ Փաշինյան Նիկոլի՝ «կռավատների» մասին՝ վերջինս ասել է. «Օրենքի առջև բոլորը հավասար են և ով ձեզ կասի, որ ինքն ունի առավելություն, սուտ է ասում, չհավատաք: Կարող են մտնել սեղանի տակ ու ասել՝ օրենքը մեզ չի կարող գտնել, բայց մենք կմտնենք սեղանի տակ էլ, կռավատի տակ էլ»:

Փաստորեն, հեղափոխականները կրկին հարձակվում են, սակայն այս անգամ ասֆալտը փոխարինված է սեղանների և մահճակալների տակերով: Սա ունի մեկ բացատրություն: Ասֆալտը հասանելի է բոլորին: Այն դուրսն է լինում: Եվ եթե ասֆալտին ինչ-որ գործողություն ես իրականացնում, դա բոլորն են տեսնում: Իսկ եթե մի բանը հասանելի է բոլորին, ապա դրա հետևանքների և արդյունքների մասով հաշվետվություն տալը դժվար է: Եվ իրոք, սեպտեմբերին Փաշինյան Նիկոլի հրամանով մի քանի հոգու ասֆալտին փռեցին: Հետո՞: Դրանից հետո ոչինչ չեղավ, և հասարակությունն անտեղյակ մնաց իրականացված գործողության արդյունքից: Դրա հետ կապված որևէ հաշվետվություն չեղավ: Սեղանների և մահճակալների դեպքում այդպես չի լինելու, քանի որ դրանք չեն կարող տեղադրված լինել դրսում: Դրանք պետք է գտնվեն փակ տարածությունում, ինչը նշանակում է, որ դրանց տակի հատվածում իրականացված օպերատիվ գործողություններին չեն կարող հետևել հասարակության լայն զանգվածները: Դա իր հերթին նշանակում է, որ այդ գործողության հաշվետվությունը պահանջողների քանակն էապես նվազ է լինելու: Մենք հաջողություն ենք ցանկանում Փաշինյան Նիկոլին և հուսով ենք, որ սեղանների և մահճակալների մարտավարությունը մեծ հաջողություններ կբերի նրան: