Միրզո Արարատյան

Փաշինյան Նիկոլն էսօր անմեղ նախրին հանեց փողոց և իր հետ քայլել տվեց գրեթե ողջ քաղաքով: Երեկվանից ստույգ տվյալներ կային, թե ռեսուրս է օգտագործվել, մասնավորապես՝ Աշոտյանին էին ահազանգել դպրոցների տնօրեններ: Այնուամենայնիվ, իր անձնական նախիրն այսօրվա երթի հիմնական մասսան էր, իսկ երթը խայտառակ սակավաթիվ էր, ինչը սարսափեցրեց Փաշինյան Նիկոլին:

«Աննախադեպ երթ»,- վայնասուն են դրել նիկոլական լրատվամիջոցները: «Փաշինյանը տապալեց ՀՀԿ-ին ու Սասնա ծռերին»,- համոզված է 1in.am-ը: Թե ինչպես արտահայտվեց այդ տապալումը` անհայտ է: Բայց համամիտ ենք, որ երթն իսկապես աննախադեպ էր, քանզի աշխարհում առ այսօր դեռ ոչ մի ղեկավարի մտքով չէր անցել նախիր հանել փողոց և տասնյակ կիլոմետրեր քայլել: Եվ այս ամենը` բացարձակ անիմաստ:

Ի վերջո, ո՞րն էր երթի իմաստը: Ի՞նչ էր ուզում ասել կամ ապացուցել Փաշինյան Նիկոլը: Եվ ո՞ւմ: «Մենք սրանով ևս մեկ անգամ ի ցույց դրեցինք, որ մեր կամքը քարից էլ ամուր է և մեր հոգին հանձնվել չգիտի: Մենք վայելում ենք մեր ժողովրդի վստահությունը, մանդատը, մենք ժողովրդի գլխավորությամբ Հայաստանը կառաջնորդենք դեպի երջանկություն… Հայաստանում սկսվում է ոչ բռնի, թավշյա տնտեսական հեղափոխությունը, որի արդյունքներով Հայաստանն իսկապես դառնալու է հզոր, բարձր տեխնոլոգիաներով արդյունաբերական բարեկեցիկ երկիր, երջանիկ մարդկանց երկիր»,- ասում է Փաշինյան Նիկոլը: Մի՞թե այս պոպուլիստական հայտարարության համար արժեր քայլել 37 կիլոմետր: Մի՞թե չկար այլ հարթակ, այլ եղանակ հանրությանն այս ամենը հասցնելու:

ՀՀԿ ցուցակի երրորդ համար Դավիթ Շահնազարյանը համոզված է, որ այսօրվա երթով Փաշինյան Նիկոլն ուզում է տապալել ընտրությունները. «Նա շատ լավ հասկանում է՝ եթե խոսում էր 80–90 տոկոսի մասին, հիմա ինքը լուրջ խնդիր է ունենալու արդեն դեկտեմբերին մեծամասնություն ունենալու համար։ Դրա համար սեղանը պետք է շուռ տալ։ Սա է իր պարզունակ ծրագիրը, իր անակնկալը։ Սա մարտահրավեր է մեր պետականությանը. Նիկոլ Փաշինյանը տապալում է առաջիկա ընտրությունները, չի հաջողվելու դա իրեն»,- ասում է Շահնազարյանը, և նրա խոսքի մեջ ճշմարտություն կա: Չմոռանանք, որ նա Փաշինյանի հետ 10 տարի առաջ այլ ճամբարում էր և լավ ճանաչում է նրան: Ժամանակը ցույց կտա Շահնազարյանի ճշմարտացիությունը, իսկ մենք հավելենք, որ այսօրվա երթն աննախադեպ էր, անիմաստ և, ամենակարևորը` նորմալ մարդու բան չէր: Սպասենք քարոզարշավի մեկնարկին: