Առիթ ունեցել ենք գրելու այն մասին, որ Սննդամթերքի անվտանգության պետական ծառայության նորանշանակ ղեկավար Գեորգի Ավետիսյանը «թավշյա հեղափոխության» օրերին ծաղրում էր ինչպես հեղափոխականներին, այնպես էլ Նիկոլ Փաշինյանին, և շատերի համար էր զարմանալի, թե նա ինչպես ու ինչու տեղ զբաղեցրեց նոր իշխանության շարքերում: Բայց երբ այս մասին հարցնում են անձամբ Ավետիսյանին, նա զայրանում է և հորդորում չխառնվել Նիկոլ Փաշինյանի հետ իր հարաբերություններին։

Ավետիսյանը Նիկոլի հետ հարաբերություն ունենալ կարող է իր հոր տանը, մի կտոր հաց ուտելիս: Կառավարությունում այդ հարաբերությունները քաղաքական նշանակություն ունեն: Եվ իբրև բարձրաստիճան պաշտոնյա ժամանակն է, որ հասկանա` պետության ղեկավարումը վեր է անձանական հարաբերություններից, իսկ համոզմունքներն ու սկզբունքները գործընթացների շարժիչ ուժ են: Եվ եթե դու քո պատկերացումներով դեմ ես այն ամենին, ինչ կատարվում է երկրում, ապա ի՞նչ գործ ունես այդտեղ:

Գալով Փաշինյան Նիկոլին, պիտի ասենք, որ նրա արձագանքը նույնպես բանի նման չէր: Անդրադառնալով հարցին, թե ինչպես է վերաբերում վերոնշյալ փաստին, վարչապետն ասել էր. «Գեորգի Ավետիսյանի նշանակումը վառ ապացույց է, որ Հայաստանում տեղի է ունեցել սիրո և համերախության հեղափոխություն, որովհետև եթե նայենք, թե ով, երբ, ում է ծաղրել, այդ ցանկը կարելի է շարունակել, բայց ես կոչ եմ անում դրա վրա ժամանակ չծախսել»:

Սա առնվազն արտառոց արձագանք է, որովհետև եթե մարդու համար հեղափոխությունն ու նրա առաջնորդը ծաղրուծանակի առարկա են, ապա այդ չինովնիկն ինչպե՞ս է պատրաստվում ծառայել նոր Հայաստանի գաղափարներին: Եվ այս դեպքում ի՞նչ խոսք կարող է լինել սիրո ու համերաշխության մասին, եթե ծաղրանքն ինքնին նախ սերն է բացառում, իսկ հետո նաև համերաշխ լինելու հանգամանքը: Այնպես որ, տղերք, ձեր բառախաղերը ձեզ պահեք ու թոզ մի փչեք: Եթե հիմքում այլ կապեր ու շահեր կան, միանգամից ասեք, թե չէ խոսքը կտուրն եք գցում, որ ի՞նչ լինի: