Ստացվեց այնպես, որ անցնող շաբաթվա ամենաաղմկահարույց դեպքը պատահեց վերջում ու ստվերեց նախորդ յոթ օրերի մեծ ու փոքր կարևորությամբ իրադարձությունները: Կալանավորվեց ՀՀ երկրորդ նախագահ Ռոբերտ Քոչարյանը: 2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործով նախաքննության արդյունքների հիման վրա հուլիսի 26-ին Քոչարյանին մեղադրանք առաջադրվեց ՀՀ քրեական օրենսգրքի 300.1-ին հոդվածի 1-ին մասով` այն բանի համար, որ նա այլ անձանց հետ նախնական համաձայնությամբ տապալել է Հայաստանի սահմանադրական կարգը: Երևանի ընդհանուր իրավասության առաջին ատյանի դատարանը մեկ օր անց Քոչարյանի նկատմամբ որպես խափանման միջոց ընտրեց կալանավորումը:

Սա աննախադեպ որոշում էր, ինչն անմիջապես հասարակությանը և քաղաքական ուժերին տրոհեց երկու հակադիր բևեռների: Եթե մի խումբը ցնծությամբ էր ընդունում նախկին նախագահի կալանավորումը, ապա մյուսները տագնապ էին հնչեցնում և պնդում, որ դրա համար հիմքեր չկան: Իսկ հետո իրավիճակն ավելի բարդացավ, երբ Հատուկ քննչական ծառայություն հրավիրվեց ՀԱՊԿ գլխավոր քարտուղար Յուրի Խաչատուրովն ու նրան նույնպես ներկայացվեց նույն մեղադրանքը: Ճիշտ է, գեներալին ավելի ուշ բաց թողեցին 5 միլիոն գրավի դիմաց, սակայն դա մխիթարություն չէր նույն գործի շրջանակներում արդեն կանչվածների և մոտ ապագայում կանչվողների համար:

Առայժմ հստակ չէ, թե նման զարգացումները մինչև ուր կարող են հասնել, իսկ այդ ընթացքում մի շարք կուսակցություններ ու դաշինքներ լրջորեն տարված էին Երևանի ավագանու սպասվելիք ընտրությունների հոգսերով: Դրանց թվում առավել մեծ ուշադրության արժանացավ «Քաղաքացիական պայմանագիր» կուսակցությունը, քանի որ վերջինս միանգամից չորս հավանական թեկնածուի է հրապարակ նետել` հանձինս Ալեն Սիմոնյանի, որն ի սկզբանե հայտնի էր քաղաքապետ դառնալու իր հավակնություններով, դերասան Հայկ Մարությանի, Զարուհի Բաթոյանի ու Սրբուհի Ղազարյանի: Նրանցից և ոչ մեկը չի արժանացել երևանցիների համակրանքին, սակայն կիրակի ուշ գիշերին տեղեկացվեց, որ առաջադրվողը կլինի Կարգին Հայկոն: Այնպես որ ՔՊ տվայտանքները դեռ առջևում են:

Տվայտալից օրեր ապրեցին նաև խորհրդարանի պատգամավորները, որտեղ շաբաթվա ընթացքում շարունակվեցին Ընտրական օրենսգրքի փոփոխությունների շուրջ քննարկումները: Այդ ընթացքում ամենաինքնատիպ առաջարկներից մեկը ներկայացրեց ՀՀԿ-ն, ըստ որի՝ պետք է համապատասխան նորմ ամրագրվի, որով ընտրություններից առաջ յուրաքանչյուր քաղաքական ուժ պետք է ներկայացնի ապագա կառավարության իր կազմը, որը կգործի ընտրությունների արդյունքում մեծամասնություն դառնալու դեպքում: Բայց մյուսների համար սա կարծես թե այնքան էլ ընդունելի չէր: Կառավարության կազմ նախօրոք ներկայացնելը կարող էր կտրուկ կերպով նվազեցնել որոշ քաղաքական ուժերի վարկանիշը:

Ի դեպ, վարկանիշի իմաստով ամենամեծ մտահոգության պատճառներ այս շաբաթ ուներ կառավարությունը, որի «պատժիչ» գործողությունների արդյունքում շատերն էին ստիպված լինում խոստովանել իրենց մեծ հիասթափությունների մասին: Այդպես պատահեց, երբ Երևանի «Գրիգոր Լուսավորիչ» բժշկական կենտրոնի տնօրենի պաշտոնից հարկադրաբար ազատվեց Արա Մինասյանը, ինչից հետո ԲԿ աշխատակիցներն ու բազմաթիվ քաղաքացիներ բողոքի ակցիաներ կազմակերպեցին: Այդպես պատահեց, երբ Տավուշի մարզի զայրացած բնակիչները փակեցին դեպի Իջևան տանող ճանապարհը` կառավարությունից պահանջելով թույլտվություն անտառներում հատումներ իրականացնելու համար: Այդպես պատահեց, երբ մի շարք համայնքների ղեկավարների նկատմամբ քրեական գործեր հարուցվեցին չարաշահումների մեղադրանքներով, թեև մարդիկ պնդում էին, որ դա ընդամենը շանտաժ է` գործող համայնքապետերին հեռացնելու և նրանց փոխարեն իրենց մարդկանց բերելու հեռանկարով:

Ինչ վերաբերում է նրանց, ովքեր արդեն ճաղերի հետևում էին, ապա ասենք, որ շաբաթվա ընթացքում Հայաստանի երրորդ նախագահ Սերժ Սարգսյանի թիկնազորի նախկին պետ Վաչագան Ղազարյանը վճարեց դատարանի սահմանած 1 միլիարդ դրամ գրավն ու ազատ արձակվեց կալանքից: Իսկ ահա Գագիկ Ծառուկյանի թիկնազորի պետ Էդուարդ Բաբայանի բախտը չբերեց: Վերաքննիչ քրեական դատարանը մերժեց նրա խափանման միջոց կալանքը փոխելու փաստաբանի միջնորդությունը։ Այդ փաստից ԲՀԿ-ն զայրացավ ու հայտարարեց, որ սա ոչ թե իրավական, այլ քաղաքական գործընթաց է, ասել է թե` Ծառուկյանին վարկաբեկելու բացահայտ միտում կա:

Նա, ով իբրև թե վարկաբեկողն էր, այսինքն՝ վարչապետ Նիկոլ Փաշինյանը, հուլիսի 26-ին մեկնեց Սանկտ Պետերբուրգ՝ մասնակցելու ԵԱՏՄ միջկառավարական խորհրդի նիստին: Իսկ ընդհանրապես նախորդ 7 օրերի ընթացքում ամառային հանգստի տրամադրված հասարակության համար քիչ թե շատ նշանակալի համարվեցին իրարից խիստ տարբեր, բայց նույն տրամաբանությանը ենթակա դրվագները, օրինակ՝ այն, որ Հանրային ծառայությունները կարգավորող հանձնաժողովի նախագահ Ռոբերտ Նազարյանը վայր դրեց լիազորությունները, Մուշեղ Բաբայանն ազատվեց Հայաստանի հատուկ քննչական ծառայության պետի տեղակալի պաշտոնից, իսկ Էջմիածնի ավագանին միաձայն կողմ քվեարկեց Մանվել Գրիգորյանին Էջմիածնի պատվավոր քաղաքացու կոչումից զրկելուն: Նույն օրերին հայ-թուրքական սահմանին 5 սահմանախախտի ձերբակալեցին: Ձերբակալված 5 անձինք Աֆղանստանի քաղաքացիներ էին: Այդպես էլ անհասկանալի մնաց, թե նրանց ինչն էր բերել մեր երկրի տարածք:

Եվ մինչ մարդիկ տարուբերվում էին հուլիսյան շոգերի և քաղաքական սառը ցնցուղների միջև, հինգ օր անընդմեջ շարունակվում էին Հաղթանակ թաղամասի աղբանոցի հրդեհաշիջման աշխատանքները: Կրակը ոչ մի կերպ մարել չէր հաջողվում: Հավանաբար երկրում հավաքված աղտեղության ծավալները ոչ միայն շատ մեծ են, այլև դրանք դառնում են հրդեհավտանգ: