Ինչպիսի բնորոշումներ էլ փնտրենք ավարտվող շաբաթվա համար, այնուհանդերձ, այն ավելի շատ ծայրահեղացումների ժամանակահատված էր, քան սուր անկյունները համահարթելու: Ներքին կյանքում յուրաքանչյուր քայլ վերստին տանում էր գույների խտացման, և ավելի քիչ բան էր մնում «սիրո ու համերաշխության» խոստումներից:

Շաբաթվա առաջին օրը ենթադրվում էր, որ պիտի նշանավորվեր Երևանի նոր քաղաքապետի ընտրությամբ: Բայց, ինչպես և կանխատեսում էին շատերը, հուլիսի 16-ին նշանակված Երևանի ավագանու նիստը համարվեց չկայացած քվորումի բացակայության պատճառով: Փաստացի երկու հիմնական քաղաքական ուժերը` ՀՀԿ-ն և «Ելքը», այն բոյկոտեցին, որպեսզի գնան ավագանու արտահերթ ընտրությունների: Ըստ լուրերի, ընտրությունները կարող են տեղի ունենալ սեպտեմբերին:

Պակաս դժվարին չէին հարաբերությունները մերձավոր բարեկամների հետ: Ամեն ինչ սկսվեց նրանից, որ ռուսական 102-րդ ռազմաբազայի ստորաբաժանումները ուսումնական վարժանք իրականացրին Փանիկ գյուղում։ Գյուղի փողոցներում պայթյուններ, կրակոցներ էին հնչել։ Գյուղացիները խուճապի էին մատնվել։ Իրավիճակը հատկապես լարվեց այն բանից հետո, երբ հայտնի դարձավ, որ զորավարժանքների մասին նախօրոք չէին տեղեկացվել պատկան մարմինները: Ռուս բարձրաստիճան զինվորականները շտապեցին ներողություն խնդրել կատարվածի համար: Սակայն կառավարության նիստում վարչապետ Նիկոլ Փաշինյանը յուղ լցրեց կրակի վրա` շեշտելով, որ կատարվածը սադրանք է հայ-ռուսական բարեկամական հարաբերությունների նկատմամբ: Երկու կողմերը նրա հայտարարությունն ընկալեցին յուրովի:

Անսպասելի դրվագների շարքին պիտի դասել տեղեկությունն այն մասին, որ կառավարական առանձնատանը տեղի ունեցավ Նիկոլ Փաշինյանի և առաջին նախագահ Լևոն Տեր-Պետրոսյանի հանդիպումը: Առաջին նախագահն իր տեսակետներն էր հայտնել Հայաստանի առջև ծառացած մի շարք մարտահրավերների հաղթահարման ուղիների վերաբերյալ: Քննարկվել էին արտաքին քաղաքականությանը և Արցախյան հիմնախնդրին վերաբերող հարցեր: Սակայն հանրությանը ոչ այնքան հետաքրքրեց նրանց զրույցի օրակարգը, որքան այն փաստը, որ այդ երկու դեմքերը կարող են նստել մի սեղանի շուրջ` հաշվի առնելով նրանց նախկին սառը հարաբերությունները:

Շաբաթվա աղմկահարույց սենսացիան դարձան կառավարության երկու աշխատակիցների խայտառակ հրաժարականները: Սկզբում այդ քայլին դիմեց առաջին փոխվարչապետ Արարատ Միրզոյանի մամուլի խոսնակ Կարպիս Փաշոյանը, որն ապրիլյան պատերազմի հերոսների հասցեին անհարգալից էր արտահայտվել: Ի դեպ, այս տղան հեռացավ նույնքան անհարգալից ոճով` հրաժարականից առաջ իր ֆեյսբուքյան էջում գրելով. «Արտառոց ոչինչ տեղի չի ունեցել, պարզապես բանականությունը պարտվեց ռազմահայրենասիրական շիզոֆրենիային, կյանքը ցույց կտա, թե ովքեր են անարգում հերոսների հիշատակը»: Նրանից հետո իր հրաժարականի դիմումը գրեց վարչապետի աշխատակազմի գործերի կառավարիչ Գևորգ Աճեմյանը, որը «Կյանքի խոսք» աղանդի ներկայացուցիչ էր և կարճատև պաշտոնավարման ընթացքում հասցրել էր որոշ անօրինականություններ թույլ տալ: Այս երկու նորելուկների հրաժեշտը եղավ հերթական վկայությունն այն բանի, որ հեղափոխականների կադրային բազան ոչ միայն իդեալական չէ, այլև բաղկացած է դեմքերից, որոնց ներկայությունն ամոթալի կլիներ ցանկացած այլ միջավայրում:

Ինչ խոսք, անցնող յոթ օրերը թերի կլինեին, եթե կրկին բարձրության վրա չգտնվեր հերոսական ԱԱԾ-ն: Սրանք այլևայլ մեծուփոքր մերկացումների հետ մեկտեղ բացահայտեցին կոռուպցիոն սխեմա, որում ներգրավված էին մի խումբ քաղաքացիներ, պաշտոնատար անձինք, այդ թվում` բժիշկներ, զինկոմիսարիատի աշխատակիցներ: Վերջիններս կաշառքի դիմաց կազմակերպել և իրականացրել էին զորակոչի ընթացքում բժշկական կեղծ ախտորոշումների հիմքով պարտադիր զինվորական ժամկետային ծառայությունից 40-ից ավելի զինակոչիկների ազատելու կամ տարկետում տրամադրելու գործընթացը:

ԱԱԾ դիրքերն առավել ամրապնդեց վարչապետ Փաշինյանը ոչ միայն այն բանով, որ Արթուր Վանեցյանին առաջարկել էր գլխավորել ՀՖՖ-ն, այլև լրագրողների հետ իր առաջին մեծ ասուլիսով, որտեղ նա ամփոփում էր իր կառավարման 72 օրը: Փաշինյանը խոսեց կոռուպցիայի դեմ պայքարում իրենց մեծ ձեռքբերումների մասին, իսկ հաջորդ օրն այսպիսի մի հետևություն արեց ասուլիսի արդյունքների մասին. «Զարմանալի էր, որ սոցիալական ցանցերը փոթորկող ոչ մի թեմայով ինձ հարց չուղղվեց երեկվա ասուլիսի ընթացքում։ Սա ստիպում է մտածել, որ կարծիքները, թե սոցիալական ցանցերի «փոթորիկները» ֆեյքերի բանակների և մեծ փողերի տիրապետող ինչ-որ ուժեր են հրահրում, առնվազն անհիմն չէ։ Թե՞ այլ պատճառներ գոյություն ունեն»։

Անշուշտ, կային այլ պատճառներ, և, անշուշտ, վարչապետը դրանց մասին բոլորից լավ գիտեր: Սակայն հիմա նպատակահարմար էր գնահատականն այդպես հնչեցնել ֆեյսբուքյան փոթորիկների մասին: Եվ դա անում էր մի մարդ, ով ընդամենը 1-2 ամիս առաջ ասում էր, որ Հայաստանում կատարվածը նաև ֆեյսբուքյան հեղափոխություն է` նկատի ունենալով թե՛ իր փոթորիկները, թե՛ իր «ֆեյքերը»:

Եթե առանձնացնելու լինենք անցած շաբաթվա առավել կարևոր դրվագները, ապա կարող ենք նշել, որ տեղի ունեցավ ՀՀ Առաջին հանրապետության հիմնադիր Արամ Մանուկյանի արձանի բացման արարողությունը: Հետո ռուս պրանկերներ Վլադիմիր Կուզնեցովը և Ալեքսեյ Ստոլյարովը չար խաղ խաղացին. ներկայանալով Հայաստանի վարչապետ Նիկոլ Փաշինյան՝ նրանք Եվրահանձնաժողովի ղեկավար Ժան-Կլոդ Յունկերին հրավիրել էին Երևան՝ խորոված ուտելու: Այս զվարճալի ֆոնին հանրապետության մի շարք համայնքներում խոշոր յուրացումների դեպքեր բացահայտվեցին: «Սասնա ծռերի» զինյալներից ևս 4-ը ազատ արձակվեցին: Կաթողիկոսի հայրապետական տնօրինությամբ կարգալույծ հռչակվեց Կորյուն աբեղա Առաքելյանը` եկեղեցականին անհարիր վարքագծի և հակականոնական ընթացքի համար: Վահագն Հարությունյանն ազատվեց ՀՀ Քննչական կոմիտեի նախագահի տեղակալի, հատկապես կարևոր գործերի քննության գլխավոր վարչության պետի պաշտոնից, իսկ գեներալ-մայոր Միքայել Արզումանյանն ազատվեց գլխավոր ռազմական տեսուչի տեղակալի պաշտոնից՝ իր դիմումի համաձայն։

Մնացյալը` ինչպես գիտեք: