Արևմուտքի ֆինանսական աջակցությունից դժգոհ Նիկոլ Փաշինյանն արդեն մի քանի առիթներով դժգոհել է Եվրոպայից այն բանի համար, որ սրանք ըստ արժանվույն չեն գնահատել իրենց հեղափոխությունը և Հայաստանին բավարար չափով օժանդակություն չեն տրամադրել: Հավանաբար, վարչապետը կարծում էր, որ իր ահազանգերից հետո եվրոպացիները խելքի կգան, կնստեն, նորից հաշվարկներ կկատարեն և կհանգեն ճիշտ հետևությունների: Եվ արի ու տես, որ Եվրոպան հենց այդպես էլ վարվեց: Միայն թե եզրահանգումները հազիվ թե Հայաստանի վարչապետին ուրախացնեն:

Եվրոպական հանձնաժողովի Հարևանության և ընդլայնման շուրջ բանակցությունների հարցերով գլխավոր տնօրենի տեղակալ Կատարինա Մատերնովան այսօր լրագրողներին ասել էր, որ Փաշինյանի հայտարարությունը հուշեց իրենց վերանայել թվերը, մոբիլիզացնել եղածը՝ հասկանալու, թե ընդհանուր թվով ինչքան են նրանք ֆինանսական աջակցություն տրամադրել Հայաստանին: Իսկ հետո գալիս է ամենաանսպասելին:

«Մենք էլ զարմացանք, երբ հասկացանք, որ շատ ավելին էր մեր տվածը, քան ինքներս էինք կարծում: Այսօր ես տեսա, որ մեկ միլիարդ է, տարբեր մեխանիզմներով այդքան աջակցություն ենք տրամադրել Հայաստանին: Շատ լավ է, որ մենք լսեցինք վարչապետի այդ ասածը, որովհետև մենք ինքներս հետ դարձանք մեր փաստաթղթերին և հասկացանք, թե իրականում ինչքան ենք տվել Հայաստանին»,- ասաց ԵՄ պաշտոնյան։

Կատարինա Մատերնովայի խոսքերի մեջ պարզապես անհնար է չնկատել վատ քողարկված հեգնանքն ու ծաղրը: Իսկ նման մեկնաբանությունը կարող է նույնիսկ նշանակել, որ ձեր դժգոհություններին ականջալուր լինելով Եվրոպան կարող է այդ միլիարդի կեսը հետ վերցնել: Այնպես որ, կարիք չկա հաշվել նվեր տված ձիու ատամները, առավել ևս, որ դեռ այնքան էլ հստակ չէ, թե այդ նվերն ինչ նպատակների պիտի ծառայեցվի: