Օսկան Քոչարյան

«Ալյանս» կուսակցության ղեկավար, ԱԺ «Ծառուկյան» խմբակցության անդամ Տիգրան Ուրիխանյանի վարկաբեկված կերպարը հավելյալ ապացույցներ վաղուց չի պահանջում: Բայց նրա «քաջագործությունների» շղթան վերջ չունի, և հիմա այս սուբյեկտի հերթական մեքենայություններն են բացահայտվել, այս անգամ` Գյումրիում: Հանրապետության երկրորդ քաղաքի մի խումբ բնակիչներից ստացված նամակում ասվում է, որ նախկինում այդ փաստերի մասին բարձրաձայն խոսել չեն համարձակվել, սակայն այժմ երկրում իրավիճակ է փոխվել, և մարդիկ լիահույս են, որ իրենց գոնե հիմա կլսեն ու կօգնեն:

Իսկ պատմությունն այն մասին է, թե ինչպես է Ուրիխանյանը համայնքային ընտրությունների քարոզարշավի շրջանում օգտվել քաղաքացիների զանազան ծառայություններից, ընդգրկել նրանց ընտրական շտաբներում ու կուսակցության գրասենյակներում, հանձնարարել բազմաթիվ աշխատանքներ, սակայն ընտրությունների ավարտից հետո անհետացել է, այդպես էլ այս մարդկանց չվճարելով խոստացված գումարները: Անցել է բավականին ժամանակ, տասնյակ ահազանգերը մնացել են անպատասխան, միայն թե, ինչպես հիմա ենք տեսնում, Ուրիխանյանին այդպես էլ չի հաջողվել ամիսների փոշիների մեջ թաղել իր խարդախության հետքերը:

Ասել, թե այս մարդիկ նրա նվիրյալներն ու երդվյալ համակիրներն են, մեծ սխալ կլինի: «Ալյանսի» պարագլուխը հրաշալի թիրախավորում է կատարել` ընդգրկելով այնպիսի մարդանց, որոնք լուրջ սոցիալական խնդիրներ են ունեցել, և ժամանակավոր աշխատանքով գոնե մի փոքր գումար աշխատելու հնարավորությունը նրանց իրավունք է տվել համաձայնել և դառնալ Ուրիխանյանի «պատգամաբերն» ու վստահված անձինք:

Շատ կարճ ժամանակ պահանջվեց հասկանալու համար, թե ինչպիսի գրպանահատի ցանցն են ընկել: «Նա ստոր խաբեբայի մեկն է, նա իրավունք չունի պատգամավոր լինել»,- հիմա ասում է խաբվածներից մեկը` կրկնելով մի միտք, որի մասին իրենից առաջ տասնյակ ու տասնյակ մարդիկ են ասել տարիներ շարունակ (տե՛ս տեսանյութը): Ոմանք ջանացել են այս ընթացքում պահանջել չվճարված գումարները, ինչին ի պատասխան Ուրիխանյանը փոխանցել է, թե դատական գործ կհարուցի նրանց դեմ, քանի որ գյումրեցիներն իրեն սպառնում են: Ի վերջո հայտնի մանիպուլյատորն իր զոհերին ասել է, որ նրանց ոչ մի լումա չի պատրաստվում վճարել այն պարզ պատճառով, որ իր կուսակցությունը պարտություն է կրել: Սա արդեն շատ զվարճալի պիտի հնչեր, եթե չլիներ այդքան տխուր:

Մի բան հստակ է. իրականում գրասենյակների համար ԲՀԿ-ն գումարները հատկացրել է, իսկ Ուրիխանյանը պարզապես դրանք գրպանել է: Այդպես են ասում տուժածները: Համենայն դեպս, մարդիկ, ովքեր աշխատել են նրա համար, ունեցել են այն համոզմունքը, որ սա Գագիկ Ծառուկյանի կողմնակցին է ու հազիվ թե չկատարի իր խոստումները: Այժմ Ուրիխանյանի մութ գործերի ամբողջ ծանրությունն ընկնում ու վարկաբեկում է առաջին հերթին Ծառուկյանին, որը, ըստ լուրերի, արդեն գիտի ամոթալի պատմությունը և ասում են, որ շատ զայրացած է:

Թե ի՞նչ արժե Գագիկ Ծառուկյանի զայրույթը, դրա մասին, հավանաբար, շուտով կիմանանք: Ցավոք, սա կարծես թե նրա առաջին զայրույթը չէ Ուրիխանյանի առիթներով, բայց արի ու տես, որ հետևանքները գոհացուցիչ չեն եղել: Ի՞նչ իմանաս, գուցե այս անգամ այլ կերպ լինի: Գոնե գյումրեցիները դրա արդյունքում մի բան կստանան: