Նախագահ Արմեն Սարգսյանին Միացյալ Նահանգներ են ուղարկել հաճելի և ուրախ ճամփորդության, իսկ նա գնացել և ընկել է միջազգային սկանդալի մեջ: Պատմում են, որ Վաշինգտոնում Սմիթսոնյան «Ֆոլքլայֆ» փառատոնի (Smithsonian Folklife Festival) բացման արարողության ժամանակ մեր նախագահը հրաժարվել է սեղմել Իսպանիայի դեսպանի ձեռքը: Ամեն ինչ սկսվել է նրանից, որ դեսպանն արարողության ընթացքում հայտարարել է, թե իր երկրում չկան քաղբանտարկյալներ: Այս խոսքերից դժգոհել է Կատալոնիայի պատվիրակությունը և, ի նշան բողոքի, լքել է դահլիճը։ Դրանից հետո Իսպանիայի դեսպանը մոտեցել է Արմեն Սարգսյանին` նրա ձեռքը սեղմելու, բայց նա հրաժարվել է։

Արմեն Սարգսյանի ձեռքսեղմումից հրաժարվելը պիտի նշանակի, որ նա հաստատում է քաղբանտարկյալների գոյությունը: Այս ամենն իմանալով հանդերձ մեզ մնում է միայն երկու հարց հստակեցնել: Բոլոր այն մարդիկ, որոնց ձեռքը ՀՀ նախագահը սեղմում է, իսկապե՞ս ներկայացնում են երկրներ, որտեղ քաղաքական հայացքներով հալածվածներ չկան, ու Սարգսյանը դա ինչպե՞ս է ճշտում: Եվ վերջապես, եթե օտար երկրներում Հայաստանի դեսպաններն են գնում ձեռքսեղմումի, մյուսներն ինչպե՞ս են վարվում, որովհետև տարիներ շարունակ Հայաստանում քաղբանտարկյալների առկայության հարցը վիճաբանության թեմա է եղել և մինչ օրս էլ դեռ լիովին պարզ չէ` բանտերում նստածները քրեականնե՞ր են, թե՞ հալածյալներ: Այնպես որ, Երևան հասնելուն պես Արմեն Սարգսյանը լավ կաներ, եթե դա պարզաբաներ: