ՀՀ սփյուռքի նախարար Մխիթար Հայրապետյանը կրակն է ընկել ինքն իր ձեռքը: Կրակն է ընկել այն իմաստով, որ երիտասարդն ուզում է ինչ-որ բան անել, ինչ-որ բանով աչքի ընկնել, ինչ-որ բանով տարբերել, բայց արի ու տես, որ դրա համար պետք է նախ խելք, հետո մի քիչ էլ երևակայություն, և քանի որ երկուսն էլ ակնհայտորեն բացակայում են, այդ իսկ պատճառով էլ նրա ոչ մի հեղափոխական մտահղացում իր ավարտին չի հասնում:

Նախարարություն հասնելուն պես Մխիթարը գրոհեց այն ամենի դեմ, ինչ ժառանգություն էր ստացել իր նախորդից` Հրանուշ Հակոբյանից: Այդ շարքում, բնականաբար, առաջինը պիտի լիներ «Արի տուն» ոչ այնքան հաջողված ծրագիրը: Սկզբում նոր նախարարն ասաց, որ պիտի դրա վերջը տալ: Հետո ասաց, որ մի առ ժամանակ կասեցրել է: Ապա հայտարարեց, որ կրկին մեկնարկում է, իսկ այսօր իր ֆեյսբուքյան էջում նա բառացիորեն հետևյալն է գրել. «Սիրելի՛ հայրենակիցներ, ինչպես ավելի վաղ հայտարարել էինք, ՀՀ սփյուռքի նախարարության «Արի տուն» և «Սփյուռք ամառային դպրոց» ծրագրերը մեկտեղել ենք մեր նոր ծրագրում, որի անունն է «Քայլ դեպի տուն»:

Ահա և ձեզ ջահել Մխիթարի ամբողջ պատկերացումը նորարարության մասին: Վերցնում է Նիկոլ Փաշինյանի կարգախոսից «քայլ» բառը, կցում է տիկին Հրանուշի ,Արի տուն»-ի հետ, միքս է անում և ստացվում է «Քայլ դեպի տուն» ուսումնաճանաչողական ծրագիր: Իսկ սրան արդեն գրագողություն չես անվանի: Սա ավելի վատ բան է: Եվ որպեսզի այդ վատ բանը չվերածվի նաև դժբախտության, պիտի հորդորել պատանի Մխիթարին, որ իր քայն անելիս զգույշ լինի, հանկարծ թափառս չառնի: