է ԱԺ արտաքին հարաբերությունների նախագահ, ՀՀԿ փոխնախագահ Արմեն Աշոտյանը վաղուց արդեն կորցրել է ֆեյսբուքյան ակտիվիստ լինելու համբավը: Նա հիմա հազվադեպ է գրառումներ կատարում, իսկ գրելիս էլ հանդես է բերում չափազանց զգուշավորություն: Բայց հիմա իրավիճակն այնպիսին է, որ խորագույն լռություն պահպանելը առանձնապես չի բխում նրա շահերից, այլապես դա կգնահատվի մեղավորության զգացում: Այդ իսկ պատճառով էլ Աշոտյանը ժամանակ առ ժամանակ որոշ բաներ է ասում լրագրողներին, ինչպես եղավ այսօր` խորհրդարանում:

Արմեն Աշոտյանի ասելիքը հետևյալն էր. Հայաստանում այսօր կարելի է առանձնացնել երեք ռիսկային սցենար: «Առաջին վտանգը, որ կա երկրում, և որը կարծեք թե կիսում է գործող իշխանությունը, անարխիան և քաոսն է: Երկրորդ վտանգը չափից ավելի ավտորիտար ճանապարհով գնալու գերկարգավորումների դաշտում քաղաքական այլակարծությունը սահմանափակելու կամ ճնշելու վտանգն է: Երրորդ վտանգը պոպուլիզմի այն վտանգավոր աստիճանն է, որ կարող է պարզապես էռոզիայի ենթարկել պետական մարմինների աշխատանքը»,-ասել էր նա:

Աշոտյանը Փաշինյանի համար կանխատեսումներ է անում: Հիմա հանրապետականներն Աշոտյանից նեղանալու և դժգոհելու լուրջ հիմքեր ունեն: Եթե Աշոտյանն օժտված է պայծառատեսի հատկանիշներով և կարողանում է կռահել ապագան, այն էլ միանգամից երեք սցենարներով, ապա ինչո՞ւ ժամանակին նույն բանը չարեց ՀՀԿ-ի համար: Չէ՞ որ կարող էր ամիսներ առաջ կռահել, թե ինչ էր սպասվում երկրին և հեղափոխական իրավիճակն ինչ սցենարներով էր զարգանալու: Այդ ժամանակ գոնե ՀՀԿ-ական իշխանությունը միջոցներ ձեռք կառներ ու կկասեցներ իր համար անցանկալի զարգացումները: