Կատարվեց այն, ինչը վաղ թե ուշ պիտի տեղի ունենար: Օրեր, ամիսներ շարունակ ասվում, ահազանգվում, փաստարկվում էր, որ հասարակության ներսում խմորումներ են տեղի ունենում, որ մարդկանց դժգոհությունը հասել է ծայր աստիճանի, և մի օր այն պիտի ելքեր գտնի իր համար: Սակայն դրանք մնում էին անարձագանք, և հետևանքն իրեն սպասեցնել չտվեց: Ճեղքվածքը խորացավ, և իշխանության հիմքերը սասանվեցին: Հազարավոր մարդիկ փողոց դուրս եկան` արտահայտելու իրենց բողոքն ու ընդվզումը: Իսկ հետագա գրեթե բոլոր իրադարձությունները այս կամ այն կերպ փոխկապակցված էին տիրող իրավիճակի հետ:

Մայրաքաղաքի Ֆրանսիայի հրապարակում դիրքավորված ցուցարարները շատ արագ կողմնորոշվեցին և անցան ակտիվ գործողությունների: Շաբաթը սկսեց ցուցարարների գրոհով` Բաղրամյան փողոցը արգելափակած ոստիկանների ուղղությամբ: Եղան վիրավորներ, բերման ենթարկվածներ, տուժեցին լրագրողներ: Փաշինյանի կողմնակիցներն այդքանով չսահմանափակվեցին և անցան էլ ավելի կտրուկ քայլերի` փակելով փողոցներ, պետական հաստատություններ, մետրոն, կազմակերպելով ավտոերթեր ու հավաքներ: Սկզբնական նպատակը մեկն էր` ձախողել ապրիլի 17-ին նախատեսված Ազգային ժողովը նիստը, որտեղ պիտի ընտրվեր հանրապետության նոր վարչապետը: Իշխանությունները ևս քնած չէին ու հակաքայլեր կիրառեցին: Բանը հասավ նրան, որ որոշ ՀՀԿ-ական պատգամավորներ պարզապես գիշերել էին խորհրդարանում` առավոտյան անախորժությունների չբախվելու ակնկալիքով:

Որոշիչ նիստը կայացավ: Սերժ Սարգսյանը 77 կողմ և 17 դեմ ձայների հարաբերակցությամբ ընտրվեց Հայաստանի վարչապետ: Տևական ժամանակ ակտիվ քննարկման նյութ դարձավ այն հարցը, թե ովքեր «կողմ» և «դեմ» քվեարկեցին վարչապետ Սարգսյանին, ու ինչ շարժառիթներով էին նրանք առաջնորդվում: Այս իմաստով խայթոցների մեծ բաժին հասավ «Ծառուկյան» դաշինքին: Իսկ ընդդիմադիրները նոր մարտավարություն դրեցին կիրառության մեջ, և հենց վարչապետի ընտրության օրվա երեկոյան Նիկոլ Փաշինյանը թավշյա հեղափոխություն սկսելու մասին հայտարարություն արեց: Շարժմանն արձագանքեցին հանրապետության մի շարք մեծ քաղաքների բնակիչներ:

Կրքերը գնալով թեժանում էին, հակադիր կողմերը դառնում էին առավել անհանդուրժող, գործի էին դրվում հակազդեցության նոր ձևեր ու մեթոդներ: Սրան զուգահեռ արթնանում էր նաև քաղաքական դաշտը: Մեկը մյուսի ետից սկսեցին ջրի երես բարձրանալ մոռացված, դուրս շպրտված քաղաքական ուժերը, որոնք ընթացիկ անորոշության պայմաններում փորձեր արեցին ինքնահաստատվել ու նոր հող փնտրել ոտքերի տակ: Բայց նրանց ճնշող մեծամասնությունն այդպես էլ չարժանացավ ոչ իշխանության, ոչ Փաշինյանի խմբի գրկաբաց ընդունելությանը:

Հետո հայտնվեցին նրանք, ովքեր սկսեցին իրենց ուժերը փորձել միջնորդական առաքելության ոլորտում, այն է` կողմերին երկխոսության ու բանակցությունների առաջարկներ հնչեցնել: Նրանցից մեկին` նախագահ Արմեն Սարգսյանին դա մասամբ հաջողվեց. նա գնաց Հանրապետության հրապարակ և ցուցարարների ներկայությամբ կարճ զրույց ունեցավ Նիկոլ Փաշինյանի հետ: Այս զրույցից հետո սառույցը մի փոքր հալչեց: Փաշինյանը հայտարարեց, որ երկխոսությունը թերևս կայանա, և խնդրեց, որ հավաքվածներն իրեն բանակցելու լիազորություններ տան: Նրանք դեմ չէին:

Ներքին ճգնաժամի իրադարձային թևի վրա սևեռված հասարակությունը առանձնապես չէր մտահոգվում այն ամենով, ինչը կատարվում էր դրանից դուրս: Նույն օրերին հրապարակվեցին նոր կառավարության առաջին հաստատված անդամների անունները և պարզ դարձավ, որ իր անդամներով այդ նորը հնից ոչնչով չի տարբերվելու: Միակ տարբերությունը, որ նկատվեց, դա եղավ այն, որ կառավարության առաջին նիստի ժամը փոխվեց` այն կայացավ երեկոյան:

Դրսի աշխարհը ևս մնացել էր ուշադրությունից վտարված: Փոխարենը Հայաստանում ծավալվող իրադարձություններին ակտիվորեն հետևում էին միջազգային լրատվամիջոցները: Պաշտոնական հայտարարություններով հանդես եկան ԱՄՆ Պետդեպն ու Ռուսաստանի ԱԳՆ-ն, մյուսները երկիմաստ լռություն էին պահպանում և սպասում նոր զարգացումներին: Շաբաթ օրը ԱԱԾ-ն հրապարակեց ահաբեկիչների ձերբակալելու մասին տեղեկատվություն, որոնք պատրաստվում էին պայթյուններ իրականացնել մայրաքաղաքում, իսկ Արցախի պաշտպանական գերատեսչությունը ահազանգեց, որ սահմանին ոչ միայն կա լարվածության աճ, այլև զոհ:

Տագնապներով ծայր առած շաբաթը եզրափակվեց կիրակնօրյա զարգացումներով: Նախ` Սերժ Սարգսյանը հանդիպեց Նիկոլ Փաշինյանի հետ, և երկորրդ` Փաշինյանն այդ հանդիպումից գրեթե մեկ ժամ հետո ձերբակալվեց (Սասուն և Արարատ հեղափոխականների հետ միասին): Մի խոսքով, հեղափոխությունը գլխատվեց, մնում է հուսալ, որ գոնե պետությունը չգլխատվի…