Որոշ ընդդիմադիր շրջանակներում այս օրերին հետաքրքիր միտումներ են նշմարվում: Խոսքը պաշտպանության նախկին նախարար, ՕՐՕ դաշինքի երբեմնի առաջնորդներից մեկի` Սեյրան Օհանյանի մասին է, որին կարծես թե պատրատվում են սրբադասել: Այլ կերպ չես անվանի այն մեկնաբանություններն ու հուշագրությունները, որոնք այս օրերին ի հայտ են գալիս: Ընդ որում, դրանք սկսեցին երևան գալ այն պահից, երբ հրապարակ հանվեց «զինված խմբի» գործով ՊՆ նախկին փոխնախարար Վահան Շիրխանյանի ու խմբի պարագլուխ Արթուր Վարդանյանի միջև տեղի ունեցած զրույցի գաղտնալսման վերծանման արձանագրությունը:

Հիմա պետք է փրկել Սեյրանի կաշին, բայց նախկին գործընկերների համար առավել կարևոր է լուսապսակ տեղադրել Օհանյանի գլխին և նրան ներկայացնել այն կերպարի մեջ, թե իբր նույնիսկ իշխանություն եղած ժամանակ Օհանյանն արդեն փայլուն ընդդիմադիր գործիչ էր: Այս իմաստով հատկանշական է ՕՐՕ դաշինքի անդամ, «Ժառանգություն» կուսակցության փոխնախագահ Արմեն Մարտիրոսյանի պատմածը, ով ասում է, թե իբր դեռ իր՝ ԱԺ պատգամավոր եղած տարիներին, երբ հանդիպել էր այն ժամանակվա ՊՆ նախարար Սեյրան Օհանյանին, դեռ այդ ժամանակ է Օհանյանից լսել դժգոհություններ երկրում ստեղծված իրավիճակի մասին: «Այդ դժգոհությունը լսել եմ, այդ պետական մտածողությունը տեսել եմ, իր տեսակետները լսել եմ, այդ առումով որևէ նորություն չկա: Օհանյանը շատ վաղուց բացասական գնահատականներ ուներ մի շարք վատ երևույթների նկատմամբ, որոնք մեր պետականության հիմքերը քայքայում էին»,- ասում է Մարտիրոսյանը:

Առնվազն զարմանալի բաներ է ասում Մարտիրոսյանը, ինչպես որ նրանից առաջ զարմանալի բաներ էր պատմել Շիրխանյանը: Սեյրան Օհանյանը եղել է իշխանության հենասյուներից մեկը, բանակի ղեկավարը, ուժային նախարար: Ավելի ազդեցիկ պաշտոնյա երկրում մատների վրա կարելի է հաշվել: Եվ ահա այս մեծ իշխանությամբ օժտված մարդը հանկարծ վազ է տալիս ինչ-որ մի կուսակցության երկրորդական դեմքի մոտ կամ մի թոշակառու դարձած նախկին չինովնիկի դուռը և սկսում է լաց լինել, որ երկիրը կործանվում է, հիմքերը փլուզվում են, շուրջբոլորը վատ երևույթներ են, իսկ ինքը ոչինչ անել չի կարող, բացի իր վշտերը ընդդիմադիրներին պատմելուց:

Իսկ եթե սա ճշմարտություն , ապա նման թույլ, անվճռական ու անօգնական գործիչ ինչպե՞ս է հնարավոր լուսավոր առաջնորդի կերպար կերտել: