Հայաստանում Լեհաստանի արտակարգ և լիազոր դեսպան Եժի Նովակովսկին, որ մեր երկրում ներկայացնում է ոչ միայն իր պետության, այլև ողջ Եվրամիության շահերը, շատ զարմանալի պատկերացումներ ունի պատասխանատվության և պարտավորությունների մասին: Այսօր, «ՆԱՏՕ-ն՝ Վարշավայից Բրյուսել, բարեփոխումներ Հայաստանի անվտանգության ոլորտում» թեմայով քննարկումից հետո նա հայտարարեց, որ իրենց դռները բաց են Հայաստանի համար։ «Մենք պատրաստ ենք: Մենք սպասում ենք փաստաթղթի ստորագրվելուն և հայ գործընկերների կողմից մենք կոնկրետ քայլերի ենք սպասում։ Մենք ակնկալում ենք ոչ թե խոստումներ, այլ կոնկրետ քայլեր»,- նշեց Եժի Նովակովսկին: Խոսքը նոյեմբերին Բրյուսելում կայանալիք գագաթաժողովի մասին է, որտեղ ակնկալվում է, որ Հայաստանը և ԵՄ-ը կստորագրեն շրջանակային համաձայնագիր: Ու հիմա դեսպանը շտապում է առաջնային կարգով մեզ հիշեցնել ու զգուշացնել, որ կոնկրետ քայլերը վեր են խոստումներից:

Բայց այսօր նույն վայրում խոսք եղավ նաև հայ-ադրբեջանական սահմանին տիրող վիճակի և վերջին օրերի լարվածության մասին: Ու երբ լրագրողները դեսպանին հիշեցրին, որ ԵՄ-ը նույնպես առանձնակի քայլեր պիտի ձեռնարկի, այլ ոչ թե սահմանափակվի դատարկ, անպտուղ խոստումներով, Եժի Նովակովսկին անմիջապես հղում կատարեց ԵԱՀԿ Մինսկի խմբի եռանախագահներին. «Նրանք կոչ են արել վերադառնալ հարցի խաղաղ քննարկմանը։ Մենք ուրիշ ի՞նչ կարող ենք ասել»։

Մոտեցումն անչափ յուրահատուկ է: Գործընկերներից մեկը մյուսից պահանջում է խստորեն հետևել խաղի կանոններին, բայց երբ հերթը հասնում է իրեն, ընդամենը ափսոսանքով ձեռքերն է տարածում. «Մենք ի՞նչ կարող ենք ասել»։ Ու հիմա կա՞ որևէ երաշխիք, որ նոյեմբերին կարևոր փաստաթղթի վավերացումից հետո Եվրոպան ինչ-որ պահի չի նայի Հայաստանին ու չի ասի, որ մեզ համար ոչինչ անել չի կարող: