Կոտայքի մարզի Նոր Հաճն քաղաքում հունիսի 18-ին սպասվում են ՏԻՄ ընտրություններ: Այժմ քաղաքապետի պաշտոնի համար պայքարելու են գործող քաղաքապետ, նախկին ԲՀԿ-ական Գագիկ Մաթևոսյանը և նախկին քաղաքապետ Արմեն Քեշիշյանը՝ «Ուզբո» մականունով: Երկուսն էլ ինքնառաջադրվել են: Թե՛ ՀՀԿ-ն և թե՛ ԲՀԿ-ն թեկնածուներից որևէ մեկին պաշտպանելու մասին հայտարարություններ չեն արել, և այս իմաստով առաջիկա մրցակցությունը խոստանում է բավական հետաքրքիր լինել, առավել ևս, որ արդեն իսկ կան դրա բազմաթիվ նախադրյալներ: Եթե բնակիչների համար մեծ գաղտնիք է, թե Մաթևոսյանն այս անգամ ինչպես է պատրաստվում պահել իր աթոռն առանց Գագիկ Ծառուկյանի աջակցության, ապա Ուզբոյի պարագայում հարցն ընդհանրապես ձեռք է բերում զավեշտալի-քրեական երանգներ:

Բանն այն է, որ Քեշիշյանն այս օրերին պարբերաբար հայտարարում է, թե ժողովրդի պահանջով է առաջադրվել, որպեսզի վերադարձնի «պարտքը»: Պարտք ասելով՝ նկատի ունի այն, որ 2005-ին վերընտրվել էր քաղաքապետ, սակայն այդպես էլ չպաշտոնավարեց, քանի որ ընտրություններից առաջ իրեն ամրակցված «Վիկինգ» ՄՌ-446 արտադրության զենքից 7 կրակոց էր արձակել ու սպանել «Էլեկտրական ցանցեր» ընկերության Արզնու մասնաճյուղի տնօրեն Աշոտ Մխիթարյանին: Կատարած հանցանքի համար Քեշիշյանը դատապարտվել էր անազատության, սակայն պատիժն ամբողջությամբ չի կրել և վաղաժամկետ ազատ է արձակվել:

Սա հայաստանյան ընտրական գործընթացներում միանգամայն նոր, կարելի է ասել` ավանգարդիստական մոտեցում է: Ժողովրդի առաջ հին պարտքերը մարելու խոստումը պիտի որ շատ ազդեցիկ լինի: Իսկ թե այդ պարտքերն ինչպե՞ս են կուտակվել, քանի՞ կրակոցի արդյունքում պարտք մնացին և դեռ ուրիշ ի՞նչ չհատուցված բաներ են եղել, որ պիտի մարվեին, սրանք ընդամենը նրբերանգներ են: Հիմա ցանկացած համայնքի ղեկավար կարող է օրինակ վերցնել Ուզբոյից` խոստումներ տալ, դրանք չկատարել և կրկին առաջադրվել` ասելով, թե պարտք է մնացել, իսկ պարտք լինելը գեղեցիկ բան չէ: