Արդեն մի քանի շաբաթ մամուլը համառորեն գրում է այն մասին, որ վարչապետ Կարեն Կարապետյանը պահանջում է Դաշնակցության նվազագույն ներկայություն կառավարության կազմում, իսկ որոշ անձանց հանդեպ ընդհանրապես մերժողական վերաբերմունք ունի: Պատմում էին նույնիսկ, որ որոշ քննարկումներ ուղեկցվել են գոռգոռոցներով ու հայհոյանքներով: Մինչ այս պահը դաշնակները հետևողականորեն հերքում էին նման տեղեկությունները: Սակայն այսօր ՀՅԴ Բյուրոյի ներկայացուցիչ Հրանտ Մարգարյանը փաստացի հաստատեց անհամաձայնության փաստը և նոր երանգավորումներ բացահայտեց ՀՅԴ- Կարապետյան հակամարտության շերտերում:

Վերջինս սոսկ նկատեց, որ «ՀՅԴ-ն լարված հարաբերություններ ունի վարչապետ Կարեն Կարապետյանի հետ» նախադասության մեջ «լարվածություն»-ը շատ կոպիտ բառ է: Եվ քանի որ ինքը փափուկ բառերի սիրահար է, հավելեց. «Բնականաբար, մարդիկ ենք, տեսակետներ ունենք, քննարկումներ են լինում, բայց, վերջիվերջո, կայացվում են որոշումներ: Համաձայնագրի տեքստը պատրաստ է, չստորագրելու պատճառ, որպես այդպիսին, չկա»:

Որոշումներն, իհարկե, կարելի է ստորագրել, սակայն հետևանքների մասին մտածելը ևս անհրաժեշտ է: Օրինակ, թերթերից մեկն այսօր գրել էր, որ մի խնջույքի ժամանակ վարչապետ Կարեն Կարապետյանի կատակների հիմնական թեման եղել են դաշնակցականները, և նա ասել է, թե մտածում է ՀՅԴ-ական նախարարներին կանանցով փոխարինելու մասին: Այս դիտողությունից խիստ վիրավորված Հրանտ Մարգարյանը պահը բաց չի թողել հակադարձելու վարչապետին: «Կատակի ժամանակ կարելի է շատ բան ասել, բայց, միևնույն ժամանակ, կին նախարար ունենալը կատակելու բան չէ: Ի՞նչ վատ կլինի եթե անգամ վարչապետն էլ կին լինի: Մերկելը կին է, վա՞տ վարչապետ է: Դրա մեջ ոչ մի անպատեհություն չկա, զարմանալու բան չկա, 21-րդ դարում պետք է այդպես մտածել»,- նշել է ՀՅԴ Բյուրոյի ներկայացուցիչը:

Ակնարկն առավել, քան թափանցիկ է: Փոխադարձվող կատակների մեջ թույնի չափաբաժինը հիմք է տալիս ենթադրելու, որ դաշնակներն իրենց ցանկությունների իրագործման համար ջանացել են շրջանցել վարչապետին: Վարչապետն էլ իր հերթին մոռացության չի տվել փաստը, որ ՀՀԿ քարոզարշավի բեռն իր ուսերին է կրել, հաջողության համար կուսակցությունն իրեն պարտական է ու պիտի հաշվի նստի իր պահանջների հետ: Իսկ եթե դաշնակները ապագա կառավարությունում աթոռներ ունենան, ապա Կարեն Կարապետյանը նրանց կյանքը դժոխքի կվերածի: Ընդ որում, դա էլ կարելի է անել կատակով և հումորի մեծ չափաբաժնով: