Այսօր խորհրդարանում գրեթե քարոզարշավ էր: Հատկապես ԱԺ հայտարարությունների ժամին պատգամավորները մեկը մյուսի ետևից հանդես էին բերում իրենց ողջ հռետորական տաղանդը, իսկ վերջին օրերի սահմանային լարվածության փաստը հավելյալ նյութ էր տվել նրանց: ՀԱԿ խմբակցության ղեկավար Լևոն Զուրաբյանը նույնպես նրանց շարքերում էր, ովքեր ռազմական իրավիճակը շահարկեցին քաղաքական նպատակներով: Ընդ որում, Զուրաբյանն այն կարծիքին էր, թե ռազմական գործողությունների էսկալացիան, հակառակորդի սադրանքների ակտիվացումը կարող է պայմանավորված լինել ԱԺ ընտրական գործընթացներով:

Հասկանալի է, որ ընդդիմադիրի կերպարի մեջ մտած ՀԱԿ-ի ներկայացուցիչն անմիջապես պիտի արձանագրեր, թե ՀՀ իշխանությունները կարծես թերագնահատում են իրավիճակի լրջությունը: Բայց Զուրաբյանն այդքանով չբավարարվեց և այնուհետև ցնցող մի հայտարարություն արեց: «Իշխանությունների կողմից կոպիտ սխալ էր ընտրացուցակի առաջին համարում պաշտպանության նախարարի առաջադրումը, որը, ռազմաճակատում ստեղծված անկայուն իրավիճակով պայմանավորված, անհարկի ազդեցություն է ունենալու նրա անմիջական պարտականությունների կատարման վրա` ընտրական գործընթացի ընթացքում»,- ասաց պատգամավորը:

Լևոն Զուրաբյանը մեկ անգամ չէ, որ լսարանին զարմանք է պատճառել իր մտային ելևէջումներով: Սակայն այս մեկը կարելի է եզակիների թվում դասել: Այնպես է ստացվում, որ եթե նախարար Վիգեն Սարգսյանը լիներ ՀՀԿ ցուցակի ոչ թե առաջին, այլ, ասենք, երկրորդ կամ 15-րդ հորիզոնականում, ապա իր պարտականությունները շատ ավելի բարեխղճորեն կկատարեր ու գուցե նույնիսկ ադրբեջանցիները, իմանալով այդ մասին, ընդհանրապես չհարձակվեին հայկական դիրքերի վրա: Բայց քանի որ Հանրապետականը որոշումներ կայացնելիս չի նստում ու Լևոն Զուրաբյանի հետ չի քննարկում կենսական կարևորության հարցերը, ապա արդյունքում տուժում են բոլորը` թե ՀՀԿ-ն, թե Վիգեն Սարգսյանը, թե բանակը, թե երկրի անվտանգությունը և ամենաշատը` Հայ ազգային կոնգրեսը: