Սյունիքի նախկին մարզպետ Սուրիկ Խաչատրյանի ինքնաբացարկը ՀՀԿ Սյունիքի կառույցի ղեկավարի պաշտոնից արդեն իսկ զանազան ենթադրությունների ու մեկնաբանությունների տեղիք է տվել: Սակայն իրավիճակը հազիվ թե այնքան միանշանակ է, որքան փորձում են այն ներկայացնել: Օրինակ, ԱԺ ՀՀԿ խմբակցության ղեկավար Վահրամ Բաղդասարյանը պնդում է, որ իբր Լիսկայի` ՀՀԿ կառույցի ղեկավար չլինելը դեռ չի նշանակում, որ նա գործ չունի անելու: «Իրենք իրենց գործն ունեն կուսակցությունում։ Նա ՀՀԿ երկարամյա անդամ է»,- ասում է Բաղդասարյանը:

ՀՀԿ-ական պատգամավորի բացատրությունները փոքր-ինչ ընդհանրական ու անորոշ են, հատկապես եթե խոսքն այն Խաչատրյանի մասին է, ով մշտապես հայտնի է եղել հարազատ կուսակցության համար բարձր տոկոսներ ապահովելու հմտություններով: Եվ նրանից միանգամից հրաժարվելը չի կարող մնալ անհետևանք, էլ չենք խոսում այն մասին, որ Լիսկային վերստին օգտագործելու շանսերը խիստ նվազել են:

Հասկանալի է, որ Սուրիկ Խաչատրյանի այս հերթական հրաժարականը ևս հենց այնպես տեղի չունեցավ: Նույնիսկ կարելի է ենթադրել, որ դա եղել է հենց Լիսկայի անձնական ցանկությամբ` մի տեսակ պատիժ ու սպառնալիք իր կուսակիցներին: Սովորաբար նման կերպ վարվում են այն մարդիկ, ովքեր ցանկանում են շրջապատին ցույց տալ իրենց իրական արժեքը: Հիմա Լիսկան «գին բարձրացնելու» խնդիր ունի: Իսկ այդ նպատակն իրագործելու համար նա ընդունակ է անել ամեն բան, որ իր հաջորդի` ՀՀԿ Սյունիքի կառույցի նոր ղեկավար, Սյունիքի մարզպետ Վահե Հակոբյանի բոլոր նախաձեռնությունները ձախողվեն:

ՀՀԿ-ում բոլորից լավ գիտեն Խաչատրյանի իրական բնույթը: Եվ որպեսզի հետևանքներն իսկապես աղետալի չլինեն, այդ պատճառով էլ այժմ Վահրամ Բաղդասարյանը շտապում է կուսակցության անունից հայտարարել, թե իրենք Լիսկային վերջնականապես ու մեկընդմիշտ դուրս չեն գրել, և նա շարունակում է դիտվել յուրային: Այլ կերպ ասած` հանգստացնում են զայրացած նախկին մարզպետին, նրա գլխի տակ փափուկ բարձեր են շարում, որպեսզի բացառվի թիկունքից իջեցվող հարվածը: Մնում է հուսալ, որ Լիսկան կհանդարտվի ու տեղի կտա, թեև դա ոչ ոք չի կարող հաստատապես պնդել: