Երբ ժամանակ առ ժամանակ ՕԵԿ- «Հայկական վերածնունդ» կուսակցությանը մեղադրում են այն բանի համար, որ քաղաքական դաշտում նա ամենաանազնիվ խաղացողներից մեկն է, սրանք խիստ վիրավորվում են ու փորձում են նման պնդումները որակել իբրև հանիրավի վարկաբեկում: Սակայն փաստերը համառ բաներ են, և ամեն անգամ դրանք գալիս են հաստատելու նախկին համոզմունքը:

Այսօր մի նոր տեղեկություն է ստացվել այն մասին, որ Մարալիկի շրջանի Սառնաղբյուր գյուղի «Ժառանգություն» կուսակցության ներկայացուցիչները միացել են «Հայկական վերածնունդ» կուսակցությանը: ՕԵԿ-ի կայքերը գրում են, թե իբր նրանք իրենց քայլը բացատրել են ՀՎԿ ծրագրերի և գաղափարների հանդեպ վստահությամբ ու հավատով:

Այն, որ «Ժառանգությունը» Սառնաղբյուրում էլ համակիրներ ուներ, սա իրոք ֆանտաստիկ փաստ է: Այն, որ «Ժառանգությունում» դեռ մարդ է մնացել, սա ընդհանրապես հրաշագործություն է: Բայց հիմա խնդիրն այնքան նրանցը չէ, որքան ՕԵԿ-ինը: Մի մեծ հերոսություն չէ «Ժառանգությունից» համակիրներ խլելը: Եվ ընդհանրապես, տեղափոխվողները պատկանում են մարդկանց այն տեսակին, որոնց համար չկան սկզբունքներ: Այսօր այստեղ են, վաղը կարող են մեկ այլ տեղում լինել, երրորդ օրը նոր տեր կորոնեն: «Որտեղ հաց, էնտեղ կաց» կենսաձևը, դժբախտաբար, հին արմատներ ունի: Եվ իզուր են ՕԵԿ-ում շտապում հաղթանակ տոնել: Նորերն ինչպես եկան, մի օր այդպես կդավաճանեն Արթուր Բաղդասարյանին: Ի վերջո, ով ինչ ցանում է, այն էլ հնձում է: