Հուլիսի 29-ի գիշերը Երևանում տեղի ունեցած լայնածավալ բախումները ոմանք ցանկանում են դիտարկել այն տեսանկյունից, ինչին իրենք են հակված, այսինքն` պատրաստ են իրադարձություններին վերագրել հատկանիշներ ու որակներ, որոնց մասին բուն դեպքերի մասնակիցների մտքով անգամ չի անցել: Օրինակ, ռեժիսոր, սցենարիստ և Ժիրայր Սեֆիլյանի զինակից Տիգրան Խզմալյանը, ով շատ ակտիվ է միտինգային հարթակներում, բայց ուղղակի գործողությունների ժամանակ միշտ անհետանում է, երեկվա դեպքերի մասին ասում է, թե իբր դրանք ազգային-ազատագրական պայքարի ու հակառուսական, հակապուտինյան, հակաիմպերիալիստական շարժման սկիզբն էին: Իսկ այս հանգամանքն, ըստ Խզմալյանի, կտրականապես փոխում է քաղաքական իրավիճակը Հայաստանում, ինչպես նաև այս պահին Հայաստանի տեղը և դերը համաշխարհային քաղաքականության մեջ, ու իհարկե դա կտրականապես, խորապես փոխում է ապստամբության բնույթը:

Հակառուսական ոգին խորացնելու և բոլոր սրերն իր բացահայտած թշնամու դեմ ուղղելու նպատակով նա հայտարարում է. «Մենք տեսնում ենք, որ ԱԱԾ-ն ու ոստիկանությունը միանշանակ ռուսական ուժային կառույցների, հատուկ ծառայությունների ենթաբաժիններն են… Մենք տեսել ենք այդ ողորմելի կառույցների գոյությունը Հայաստանում դեռեւս 1915 թվից: Ցարական Ռուսաստանն այդ ժամանակ գիտակցաբար թողնում էր հայ բնակչությանը թուրքական յաթաղանի տակ և պատրաստվում էր կազակներով բնակեցնել ամայացած Հայաստանը: Հիմա նույնը շարունակվում է և դա արվում է հայ ենիչերների, հայ չեկիստների միջոցով»:

Պատմագիտության ոլորտում բարբարոս ավերածություններ գործող ռուսատյաց կինոռեժիսորը սակայն չի պատրաստվում իր կեղծարարությունների տարափը փակել-պահել անցյալի էջերի մեջ: Նրա ողջ նպատակն ու մղումներն այս պահին ծառայեցվում են մեկ նպատակի՝ կեղծել նաև այսօրվա պատկերը և այդ կեղծիքի գնով իրականություն դարձնել այն, ինչի համար պատրաստ է իր հոգին ծախել սատանային: Նա ուզում է ընդարձակել կռվի դաշտը, բազմապատկել արյունը, զոհերի թիվը հազարներով հաշվել: Իսկ դրա համար չկա ավելի հեշտ ճանապարհ, քան բացել դռները և բոլորին ներս կանչել. «Եկեք, մասնակից դարձեք այդ դժոխքին, քանի որ մենք համաշխարհային ազգ ենք ու մեր խնդիրներն էլ պատրաստ ենք լուծել բոլորիդ հետ միասին»: Եվ Խզմալյանը շարադրում է համաշխարհային հեղափոխություն իրագործելու իր ծրագիրը. «Պետք է վերջ տալ մեր պայքարի մեկուսացմանը, դա ոչ միայն վնասակար է, այլ նաև թշնամություն է մեր ազգի և պայքարի հանդեպ: Դա կեղծ ու ռուսական ԿԳԲ-ի ներսում ծնված գաղափար է, որ մեզ ոչ ոք պետք չէ, ոչ սրանն եք, ոչ նրանն ենք: Սա ամենակարճ ուղին է դեպի ռուսական վիշապի երախը: Մենք հանդիսանում ենք քաղաքակիրթ աշխարհի մաս, դրա մասին են վկայում ԱՄՆ-ի և եվրապական բարձրաստիճան կառույցների բավական կոշտ արձագանքները տեղի ունեցածին: Դա նշանակում է, որ եթե հենց հիմա չլիներ արևմտյան զսպաշապիկը, ռուսական՝ Գյումրիում գտնվող թվով 13 հազարանոց բանակն այժմ արդեն քայլերթով անցնելու էր Երևանի փողոցներով»:

Ահա և վերջ: Տիգրան Խզմալյանն ասաց այն, ինչ ուզում էր ասել: Հայաստանին անհրաժեշտ է արևմտյան զսպաշապիկ, իսկ դրա համար Հայոց ըմբոստ մասի՝ ապստամբների ղեկավարությունը անմիջապես պետք է դիմի Արևմուտքին՝ օգնության ու աջակցության համար, քանի որ մենք հիմա հանդիսանում ենք հակապուտինյան ճակատի մարտական մի ջոկատ:

Այն, ինչ ասում է Խզմալյանը, ուրիշ բան չէ, քան գունավոր հեղափոխության պարզունակ սցենար: Բոլոր այն երկրներում, որտեղ դրանք իրագործվել են, ամեն ինչ կատարվել է ճիշտ այդպես. հայտնվել են մի խումբ խզմալյաններ ու «Սասնա ծռեր», դիմել են Արևմուտքին ու նրանք էլ եկել են փրկելու ժողովրդավարական արժեքները: Հիմա Խզմալյանն արդեն առաջին քայլն արել է՝ այսօր առավոտյան անձամբ գրել է համապատասխան անգլերեն նամակներ եվրոպական ու ամերիկյան բարձրաստիճան ատյաններին ու դեսպանություններին, այսինքն ներխուժման հրավիրատոմսեր է ուղարկել: «Այդպես մենք կհաղթենք, ինչպես հաղթել են Ուկրաինան, Վրաստանը»,- եզրափակում է Տիգրան Խզմալյանը՝ մեկընդմիշտ իր սեփականությունը դարձնելով դավաճանի պիտակը, ով օտարներին կանչում է նվաճելու սեփական հայրենիքը: