Տիգրան Պետրոսյանի անունով շախմատի տուն կա, քանի որ Պետրոսյանն աշխարհի չեմպիոն է եղել: Ալբերտ Ազարյանի անունով մարզադպրոց կա, որովհետև Ազարյանը օլիմպիական չեմպիոն է: Հրանտ Շահինյանի անունով կոչվող մարմնամարզության դպրոց կա, քանի որ Շահինյանը լեգենդար մարզիկ էր: Իսկ ահա, պարզվում է, որ Վանաձորում գործում է նաև ԱԺ ՀՀԿ խմբակցույթան ղեկավար Վահրամ Բաղդասարյանի անունով բռնցքամարտի մարզադպրոց: Կամ, ավելի ճիշտ, դպրոցը կոչվում է «Բաղդասարյան եղբայրներ», այսինքն ասել կուզի՝ եղբայրներով են նշանավոր մարդ, մեծ վաստակ ունեն սպորտի բնագավառում:

Ո՞վ է Բաղդասարյան Վահրամը, որի անունով կրթահամալիր կա: Ի վերջո, եթե ոչ մենք, ապա այնտեղ այցելող երեխաները մի օր իրենց ծնողներին կամ մարզիչներին հարցնելու են այդ մասին «Ի՞նչ նվաճումներ ունի նա, որից կարելի է օրինակ վերցնել»: Ու այդ ժամանակ անպայման կգտնվի ազնիվ մեկը, ով կպատմի ճշմարտությունը: Կասի, թե ինչպես ժամանակին առաջարկ է եղել պետական միջոցներով վերանորոգված ու կարգի բերված մարզադպրոցը անվանել հայտնի բռնցքամարտիկ, ԽՍՀՄ և Եվրոպայի չեմպիոն Սամսոն Խաչատրյանի անունով, սակայն առաջարկին դեմ է հանդես եկել Վահրամ Բաղդասարյանն ու իրենով արել հաստատությունը:

Նրա սնապարծությունն, ինչ խոսք, լիովին բավարարված կարելի է համարել: Միայն թե Բաղդասարյանի համար դա շատ քիչ է: Նա էլի որոշ բաներ է ուզում բավարարել: Օրինակ, իր գրպանների պարունակությունը: Իսկ դպրոցը շատ հարմար միջոց է այդ նպատակն իրագործելու համար: ՀՀԿ-ական պատգամավորը հո չի՞ պատրաստվում սեփական փողերով պահել սեփական մարզադպրոցը: Բա էլ ու՞մ համար են պետության գումարները: Եվ նա ձեռքը մտցնում է հենց այդ՝ պետական գրպանի մեջ: Արդյունքը շոշափելի է: Օրինակ, 2015-ի ՀՀ պետական բյուջեից մոտ 4.5 մլն դրամ է հատկացվել Բաղդասարյան ընտանիքին պատկանող բռնցքամարտի մարզադպրոցին: Եվ հիմա միամիտ սպորտսմենները թող գնան, իրենց բախտը լացեն: Իսկ Բաղդասարյանը ունի և անուն, և դպրոց, և փող: