Երեկ Ռուսաստանի ԱԳՆ պաշտոնական ներկայացուցիչ Մարիա Զախարովան հայտնել էր, որ Մոսկվան զարմացած է Երևանում Վերմախտի «Հայկական լեգեոնի» հիմնադիրներից մեկի՝ Գարեգին Նժդեհի արձանի տեղադրմամբ: Այս հայտարարությունը զայրույթի ալիք է առաջացրել մեր երկրում, հատկապես ռուսատյաց և արևմտամետ մամուլում, որի դրսևորումներին մենք դեռ կանդրադառնանք: Իսկ պետական իշխանության անունից այսօր հանդես է եկել տեղի Մարիա Զախարովան` Հայաստանի արտգործնախարարության խոսնակ Տիգրան Բալայանը: Նա ֆեյսբուքյան իր էջում անդրադարձել է Նժդեհի արձանի տեղադրման հետ կապված արձագանքներին, սակայն անդրադարձել է մի փոքր տարօրինակ ձևով, սյքինքն` զուտ հայկական:

Նախ, Բալայանը վերարժևորել է Նժդեհի դերը մեր երկրի պատմության մեջ, իսկ այնուհետև գրել է. «Եվ որևէ անհասկանալի բան չկա, թե ինչու է Ադրբեջանում Նժդեհի արձանի տեղադրումը առաջացնում պատվիրված հոդվածների հերթական փոթորիկը, որն ուղղակի հետևանքն է Ադրբեջանի ղեկավարի` Հայաստանի տարածքների նկատմամբ բարձրաձայնած հավակնությունների: Անբարո ու անարդյունավետ եմ համարում ֆաշիզմի դեմ պայքարում հայ ժողովրդի անգնահատելի ավանդի վրա ստվեր գցելու Բաքվի ջանքերը»:

Սա է ՀՀ ԱԳՆ պաշտոնական պատասխանը պաշտոնական Մոսկվային և Մարիա Զախարովային: Ադրբեջանն ի՞նչ կապ ունի այս ամենի հետ: Զախարովան Ադրբեջանից խոսե՞լ էր: Սա էլ Սերժ Սարգսյանի և Նալբանդյան Էդիկի կոմպլեմենտարիզմն է: Մի կողմից` չեն կարող պատասխան դատապարտումներով հանդես գալ, մյուս կողմից` չեն կարող Նժդեհի մասին ճիշտն ասել, այն է` ընդունել, որ նա հիտլերյան լեգեոներ էր, քանզի տեղադրել են նրա արձանը, էն մյուս կողմից` չեն հասկանում, թե իրենց ինչին էր պետք Նժդեհի արձանը, այն դեպքում, երբ իսկական նժդեհական երկրում գրեթե չկա` կա իռացիոնալ մի զանգված, որը դեր չի խաղում և եղանակ չի ստեղծում: