Երևանի փոխքաղաքապապետ Կամո Արեյանը կարծում է, որ Գարեգին Նժդեհի արձանը գեղեցիկ է և առնական: Իսկ հարցին, թե ինչո՞ւ արձանը չի տեղադրվել Գարեգին Նժդեհի հրապարակում, Արեյանը պատասխանում է. «Ավելի անհաջող տեղ դժվար է գտնել: Մարդկանցից հեռու, նրանց հետ կենդանի կապից հեռու: Իսկ վայրը, որտեղ հիմա տեղադրված է արձանը, առավել քան հարմար է: Կարելի է զգալ նրա վեհության շունչը»:

Երևանում կա Նժդեհի հրապարակ, որտեղ վաղուց տեղադրված է կոմունիստ Սուրեն Սպանդարյանի արձանը: Եվ այս իմաստով տրամաբանական կլիներ, որ կամ Նժդեհի արձանը տեղադրվեր Նժդեհի հրապարակում, կամ հրապարակը վերանվանվեր և կոչվեր Սպանդարյանի հրապարակ: Սակայն Կամո Արեյանի կարծիքով` դա այդպես չէ: Նրա ասելով` Նժդեհի անվան հրապարակը Նժդեհի արձանը տեղադրելու համար ամենա անհաջող վայրն է: Որպես իր ասածները հավաստող ապացույց` փոխքաղաքապետը նշում է, որ Երևանի երրորդ մասի Գարեգին Նժդեհի անունը կրող հրապարակը հեռու է մարդկանցից և կենդանի կապից: Զարմանալի է, որ, Արեյանը լինելով Երեւանի փոխքաղաքապետ, այդպիսի կարծիքի է Երևանի ամենաաշխույժ և մարդկանցով լի հրապարակի մասին: Իսկ եթե ասելով, թե Նժդեհի հրապարակը հեռու է մարդկանցից, նկատի է ունեցել, որ Երևանի այդ հատվածում բնակվող մարդիկ չեն համապատասխանում իր պատկերացրած մարդկանց տեսակին, ապա միգուցե նա ճիշտ է, քանի որ Արեյանը, տարիներ շարունակ աշխատելով եղջերավորի հետնորդ Տարոնի ենթակայության տակ, լիարժեք կորցրել է իրողության զգացումը` մտածելով միայն իր առջև գցած լափի քանակի մասին: Այդ իմաստով, իրոք անկախ ապրելատեղից, երևանցիների մեծ մասն Արեյանի պատկերացրած տեսակի մեջ չեն տեղավորվում:

Սակայն ամենավտանգավորը փոխքաղապետի ասածները Վահրամ Բաղդասարյանի ասածների հետ համադրումն է: Եվ եթե Վահրամ Բաղդասարյանը խոսում է Լեռնային Ղարաբաղի «ամայի» և «անպետք» տարածքների մասին, որոնք մեզ պետք չեն, ապա Կամո Արեյանի շուրթերից հնչեց «անհաջող», «մարդկանցից և կենդանի կապից հեռու» Երևանի Նժդեհի հրապարակի մասին կարծիքը: Նա, իհարկե, չասաց, որ Երևանի այդ հրապարակը մեզ պետք չէ, սակայն ո՞վ գիտե: Միգուցե գա այն օրը, որ 2.5 հեկտար զբաղեցնող հրապարակը Երևանի քաղաքապետարանի նախաձեռնությամբ հանձնվի հակառակորդին: