Ուկրաինան չի դադարում ուրախացնել և զարմացնել. այդ երկրի Գերագույն ռադայում գրանցվել է № 3368 օրինագիծը, որն արգելում է բնակավայրերն ու փողոցներն անվանել այն գործիչների և իրադարձությունների պատվին, որոնք կապված են ռուսական պատմության հետ՝ սկսած ХIV դարից մինչև 1917թ., տեղեկացնում է Свободная Пресса-ն։ 

Օրինագծում ասված է, որ «արգելվում է աշխարհագրական օբյեկտներին տալ անվանումներ, որոնք հանդիսանում են Ռուսական (Մոսկովյան) թագավորության, ХIV-ХХդդ. Ռուսական կայսրության կամ դրանցից ածանցվածների միապետերի, պետական, քաղաքական, ռազմական գործիչների անուններ կամ կեղծանուններ; անվանումներ, որոնք համահունչ են այդպիսի անուններին կամ կեղծանուններին, անվանումներ, որոնք ներառում են Ռուսական (Մոսկովյան) թագավորության, ХIV-ХХդդ. Ռուսական կայսրության միապետերի տիտղոսների տարրեր»։

Հեղինակների (իսկ դրանք չորս կուսակցությունների՝ «Պյոտր Պորոշենկոյի բլոկ», «Ժողովրդական ճակատ», «Բատկիվշչինա» և Լյաշկոյի Ռադիկալ կուսակցությունների պատգամավորներն են) կարծիքով՝ այս օրենքը պետք է դառնա ապակոմունիստականացման մասին օրենքի շարունակությունը, որը կարգադրում է վերանվանել խորհրդային անուններ ունեցող աշխարհագրական տեղանունները։ «Որպեսզի տոտալիտար ռեժիմներին և անկախության համար պայքարի մարտիկներին վերաբերող օրենքներն իսկապես համապատասխանեն եվրոպական պրակտիկաների ստանդարտներին, նպատակահարմար է արգելել աշխարհագրական օբյեկտներին այնպիսի անուններ տալը, որոնք կապված են ռուսամետ իմպերիալիզմի պրոպագանդայի, Ուկրաինայի գաղութային կախվածության շրջանի հետ, ինչը կարող է նպաստել նրա տարածքները յուրացնելու մտադրություններին»,- հայտարարում են նախագծի հեղինակները։

Պարբերականը ճշտում է, որ եվրոպական պրակտիկաների հետ կապված՝ պատգամավորները չափն անցել են։ Օրինակ, Բեռլինի ամենանշանավոր հրապարակներից մեկը՝ Ալեքսանդերպլատցը, անվանվել է ի պատիվ ռուսական կայսր Ալեքսանդր I-ի, իսկ Փարիզում մինչև հիմա ոչ ոք չի մտածում վերանվանել Սենայի ամենախոշոր և ամենագեղեցիկ կամուրջներից մեկը՝ Ալեքսանդր III-ի կամուրջը։

Ուկրաինացի պատգամավորների հապճեպ օրենսդրական նախաձեռնությունը պարզ բացատրություն ունի։ Անցած շաբաթ Կիրովոգրադի բնակիչները հանրաքվեով արտահայտվել են հօգուտ քաղաքին պատմական անունը (Ելիսավետգրադ) վերադարձնելու։ Բայց ուկրաինական իշխանությունները, ինչպեսև Ազգային հիշողության ինստիտուտի տիպի հաստատությունները վրդովվել էին տեղի բնակիչների այդօրինակ անգիտակցականությունից։ Անգամ հավաստիացումները, թե քաղաքն անվանակոչվել է ոչ թե ի պատիվ կայսրուհու, այլ սուրբ Ելիսավետայի, չօգնեցին։ Արդյունքում՝ քաղաքացիների կարծիքը որոշեցին արհամարհել և քաղաքի նոր անվան ընտրությունը տրամադրել Կիևի խորհրդարանին։

Սակայն նման մոտեցումը անհեթեթություն է։ Օրինակ, հետման Մազեպան նույնպես Ռուսական կայսրության պետական գործիչ էր, Անդրեյ Պերվոզվաննու շքանշանի երկրորդ աստիճանի ասպետ։ Նիկոլայ Գոգոլը նույնպես պետծառայող էր։ Այնպես որ, նոր օրենքից ուկրաինացիները ստիպված են լինելու ծիծաղելի հանումներ անել։