Հայաստանի երկրորդ նախագահ Քոչարյանը որոշել է լավություն անել գործող նախագահ Սարգսյանին. նա լծվել է սահմանադրական հանրաքվեն տապալելու գործին: Իսկ դա նշանակում է, որ սահմանադրական հանրաքվեն անպայման կտա դրական արդյունք նախաձեռնողների համար, քանզի հենց ինքը` Ռոբերտ Քոչարյանն է դեմ արտահայտվում:

«Իմ տեսակետը չի փոխվել. սահմանադրական փոփոխությունների որևէ անհրաժեշտություն չկա: Այն էլ այսպիսի՝ արմատական բնույթի: Երկրի առջև ծառացած բոլոր խնդիրներն ու մարտահրավերները լիովին լուծելի են գործող սահմանադրության շրջանակներում, որի ֆունկցիոնալությունը որևէ մեկը կասկածի տակ չի առնում»,- ասել է Քոչարյանն իր սեփական կայքին տված հարցազրույցում:

Գիտի՞ արդյոք Քոչարյանը, թե ինչ ծառայություն է մատուցում նախագահ Սարգսյանին: Դժվար: Չկան նրա շրջապատում մարդիկ, որոնք ունակ են իրականությունը տեսնել: Իսկ մի բան այդ իրականության մեջ հստակ է. եթե մի բանին դեմ է Ռոբերտ Քոչարյանը, ապա այն անհրաժեշտ է Հայաստանի համար: Եվ հակառակը: Այնպես որ, հայ ժողովուրդը դեկտեմբերին կիրականացնի նախագահ Սարգսյանի երազանքը, որպեսզի բացառի երկրորդ նախագահի վերադարձը քաղաքականություն: Դա պետք է արվի ամեն գնով, անկախ սահմանադրության տեքստի որակից և այն վերանայելու օբյեկտիվ անհրաժեշտությունից: Մեկ օբյեկտիվ անհրաժեշտություն կա այսօր երկրի համար` երբեք թույլ չտալ ՀՀ ամենաերիտասարդ թոշակառուին նորից աշխատել: