Արդեն ավանդույթ է դարձել, որ ԱԺ յուրաքանչյուր նստաշրջանից հետո մասնագետները հանդես գան դրանց ամփոփումով և վերլուծությամբ: Այս անգամ էլ «ԱԺ մոնիտորինգ» ծրագրի պատասխանատուներն ամփոփեցին 7-րդ նստաշրջանի արդյունքները: Թեմաները քիչ չէին, սակայն ներկաների ուշադրությունն առանձնապես գրավեց «Օրինաց Երկիր» կուսակցության սահմանած նոր համաշխարհային ռեկորդը: Իսկ ռեկորդն իսկապես առկա էր:

Դատեք ինքներդ: Ըստ զեկույցի, այս նստաշրջանում աննախադեպ ակտիվություն դրսևորած ՕԵԿ-ի պատգամավորները հնչեցրել են ոչ ավել, ոչ պակաս՝ 200-ից ավելի հարց ու ելույթ: Պատկերացնելու համար, թե դա ինչ ծավալ է, բավական է միայն համեմատության կարգով նշել, որ ՀՀԿ-ն իր 70 հոգանոց խմբակցությամբ հազիվ է կարողացել նման ակտիվություն ապահովել: Սա էլ ավելի զարմանալի է դառնում, եթե նկատենք, որ այն տարիներին, երբ ՕԵԿ-ը դեռ իշխանական կոալիցիայի անդամ էր, նույն խմբակցությունը ընդամենը 83 հարց ու ելույթ էր հնչեցրել: Այսինքն հիմա նախկին ծավալը գերազանցվել է գրեթե 3 անգամ:

Նման կտրուկ փոփոխությունը հիմք էր տվել «ԱԺ մոնիտորինգ» ծրագրի մասնագետներին արձանագրելու, որ ՕԵԿ-ի ակտիվությունն ունի արհեստական տարրեր: Սա, իհարկե, մեղմ ու բարեկիրթ ձևակերպման դեպքում: Իսկ եթե ավելի հստակ արտահայտվենք, Արթուր Բաղդասարյանի թիմը խորհրդարանում բլբուլ է կտրել ոչ լավ օրից: Երբ մարդուն ամեն բանից զրկում են, ուրիշ անելիք չի մնում, քան անընդհատ բողոքելն ու թնկթնկալը: Ու հիմա ՕԵԿ-ականները հենց դրանով էլ զբաղվում են: