Այսօր նախատեսված է Գագիկ Ծառուկյանին պատկանող Աբովյանին հարակից «Առինջ մոլ» շուկայի բացումը, և այս իրադարձությունը հատկանշական է երկու առումով: Նախ՝ Ծառուկյանն իր «աքսորից» վերադառնում է իբրև գործարար-առևտրական, ինչը պիտի նշանակի, որ իշխանությունների կողմից մասնակի «համաներման» է արժանացել, և մյուս կողմից՝ այս քայլով հանգուցալուծվում է Աշոտ Աղաբաբյան-Գագիկ Ծառուկյան մրցակցությունը, որն ամիսներ շարունակ լարվածության մեջ էր պահում թե այդ երկուսին և թե նրանց ձեռքը գերի ընկած վաճառողներին:

Իսկ ամեն ինչ սկսեց այն պահից, երբ «Հրազդան» շուկայի սեփականատեր, ՀՀԿ պատգամավոր Աշոտ Աղաբաբյանը չբավարարվեց իր ունեցածով և կտրուկ բարձրացրեց տաղավարների վարձավճարները: Նկատելով, որ Բուռնաշը սայթաքել է, Ծառուկյանն անմիջապես պատասխան քայլ կատարեց՝ հայտարարելով, որ եթե «Հրազդան»-ի վաճառողները տեղափոխվեն իր մոտ՝ «Առինջ մոլ», ապա պատրաստ է տարածքը տրամադրել առանց որևէ գումարի: «Երբ որ դուք կաշխատեք՝ դա կլինի 1 տարի, 2, 3, 4 տարի, երբ ձեր վիճակը կլավանա, ես դեմ չեմ, որ, ասենք, 300 դոլար վճարեք: Բայց դա կլինի այն ժամանակ, երբ դուք վճարունակ կլինեք», - խոստացավ Ծառուկյանը՝ հրաշալի հասկանալով, թե իրականում ինչ է անում: Այդ երևույթին գործարար աշխարհում ասում են «քցոցի»:

Վիրավորված Բուռնաշը կատաղեց: Նա, ով դեռ երեկ պահանջում էր տաղավարների համար 300-350 հազար վճարել, հիմա արդեն պատրաստ էր զիջել դիրքերը, գինն իջեցնել, առևտրականներին սարեր խոստանալ, միայն թե նրանք մնային: Սակայն հենց այդ պահին «Հրազդանի» գլխին նոր ամպեր կուտակվեցին՝ այս անգամ հարկային ստուգումների, տույժ-տուգանքի ու ամեն տեսակ դատական հայցերի տեսքով: Ինչ-որ մեկի ազդեցիկ ձեռքը հստակ ուղղորդում է այդ մութ ամպերը դեպի Աշոտ Աղաբաբյանի գլխավերև:

Իսկ այսօր՝ «Առինջ մոլ» շուկայի բացումը պիտի դառնա մեսիջ այն մասին, թե կողմերից որ մեկին է նախապատվությունը տալիս «հզոր ձեռքը»: Արդեն ուշացած է Բուռնաշ Աշոտի լացն այն մասին, թե «Հրազդան» ստադիոնի ճակատագիրը շատ վատ է, որովհետև հասույթները կրճատվել են մոտավորապես 70%-ով՝ Աբովյանում նոր տոնավաճառ բացելու հետևանքով և, որ միայն տոնավաճառն էր կարողանում ստադիոնին ֆինանսական ներարկումներ անել: Այս օրերին նա նաև լուրեր է տարածում, թե հաշվի առնելով վարկային ծանր բեռն ու ստեղծված իրավիճակը, չի բացառում, որ կվաճառի «Հրազդան» տոնավաճառը:

Բայց կա մի մտավախություն էլ, որ օգտվելով Գագիկ Ծառուկանի ազատած տարածքից, Բուռնաշը հանկարծ կարող է նրա փոխարեն դառնալ ընդդիմադիր: Արդեն երեկ նա ակնարկել էր, թե պետք է ազատ արձակել «Հիմնադիր խորհրդարանի» անդամներին: Տեսնես, վաղը ի՞նչ կպահանջի: Գուցե իշխանափոխությու՞ն:

Պրն Բուռնաշը ՀՀ ամենահատկանշական դեմքերից է: Եթե մեկն ուզում է կռահել, թե ինչ է իրենից ներկայացնում նոր Հայաստանի հանրային բարոյականությունը, ապա Բուռնաշը դրա հայելային արտացոլումն է. մասամբ թալանչի, մասամբ գողական, մասամբ քաղաքական, մասամք հարկերից խուսափող, մասամբ էգոիստ` իրեն աշխարհի կենտրոն համարող, Հայաստանն իր շահի համար ամբողջովին կործանող: Եվ ուրախալի է, որ Բուռնաշի նմաններին երբեմն դասեր են տալիս, երբեմն նրանք տուժում են, զրկվում են գերշահույթից և ստիպված են լինում բավարարվել նորմալ մարդկանց շահույթով` իրենց ենթարկելով դժոխային տանջանքների...