Այդպես էլ մինչև վերջ չպարզաբանված մնաց այն հարցը, թե ինչու՞ անսպասելի կերպով պաշտոնից ազատեցին Կոտայքի մարզպետ Արամ Հարությունյանին և նույնքան անսպասելի նրա փոխարեն նշանակեցին Աբովյանի քաղաքապետ, «Բարգավաճ Հայաստան» կուսակցության նախկին ղեկավար Գագիկ Ծառուկյանի փեսային՝ Կարապետ Գուլոյանին։ Սրա շուրջ տարբեր ենթադրություններ են արվում: Ոմանք համոզված են, որ իշխանությունները յուրօրինակ կերպով մասնակի փոխհատուցում տվեցին Ծառուկյանին կրած վնասների դիմաց և այն բանի համար, որ նա իրեն խելոք պահեց: Ինչ վերաբերում է Բուլկի Արամին, որի մասին վարչապետն ասաց, թե «նախկին մարզպետը շատ լավ էր աշխատում», ապա նա էլ լավ աշխատանքի համար իր մխիթարական պարգևը ստացավ` նշանակվելով Ջրային տնտեսությունների կառավարման վարչության ղեկավար: Հիմա երկուսն էլ խորը գաղտնապահություն են դրսևորում և հրաժարվում են որևէ բացատրություն ներկայացնել այդ տեղափոխումների մասին:

Բայց եթե փեսայի հարցում պատկերը քիչ թե շատ հասկանալի է, ապա Արամ Հարությունյանի ապագան այդ իմաստով չափազանց մշուշոտ է: Բանն այն է, որ վերջին շրջանում Ջրային տնտեսությունն առավելապես հայտնի է դարձել իր վատ համբավով: Այն կարծես մի տեսակ վտարվածների վերջին ապաստարան լինի: Հիշենք թեկուզ Սյունիքի նախկին մարզպետ Վահե Հակոբյանին, ով նույնպես ուրախ-ուրախ զբաղեցրեց այդ աթոռը, բայց մի քանի ամիս հետո ինքնակամ հեռացավ` սեփական բիզնեսը գերադասելով եկամտաբեր պաշտոնից: Եվ հիմա Բուլկին իրավունք ունի մտածելու, որ իրեն էլ ջուրը նետեցին` բառի բուն իմաստով: Մնում է զինվել համբերությամբ և սպասել, թե երբ Արամ Հարությունյանը կգրի ազատման դիմումը: