Շողեր Զուրաբյան

Չնայած օրինական հիմքերի բացակայությանը՝ կիևյան իշխանությունը գտավ իր հաշվին հակաահաբեկչական գործողությունների գոտում զոհված տասնհինգ մարտիկների հուղարկավորությունն ապահովելու հնարավորություն։ Պատկերացնո՞ւմ եք՝ տասնհինգ հոգու համար։ Ի՜նչ չտեսնված շռայլություն նորաթուխ ասեմ, թե դեռ չթխված ուկրաեվրոպացիների կողմից։ Հեռուն կգնան։ Շա՜տ հեռուն...

Բայց այսքանով լավ (ներողություն) նորությունները պատժիչների անվճար թաղման կազմակերպման առիթով չեն ավարտվում։ Բանն այն է, որ շատ կարևոր մեկը՝ Կիևի քաղաքային պետական վարչության բնակարանային-կոմունալ ենթակառուցվածքի դեպարտամենտի տնօրեն Դմիտրի Նովիցկին խոստացել է այսուհետ ևս միջոցներ գտնել հակաահաբեկչական գործողությունների մասնակիցների թաղման համար։ Հուսանք, որ միջոցները կգտնվեն, և թաղումների հետ կապված էլ ձգձգումներ չեն լինի։

«Քաղաքապետ Վիտալի Կլիչկոյի հանձնարարությամբ մենք դիմել ենք կիևցիներին, գործարարներին, սգո արարողակարգ մատուցող մասնավոր կազմակերպություններին՝ զոհված կիևցիների հուղարկավորությունը կազմակերպելու համար։ Դրա շնորհիվ Կիևում այսօրվա դրությամբ անվճար թաղվել է 15 մարտիկ, որոնք զոհվել են Ուկրաինայի արևելքում հակաահաբեկչական գործողության ժամանակ»,- Նովիցկուն մեջբերում է Կիևի քաղաքային պետական վարչության մամլո ծառայությունը։

Այդ ի՞նչ սուպերթաղումներ են եղել, եթե այդքան մարդ՝ կիևցիներ, գործարարներ, մասնավոր կազմակերպություններ և այլն, և այլն, փող են տվել դրանց համար։ Ապրի՛, հա՛, Կլիչկոն։ Կարող էր և ինքը մենակ (հաստատ չէր աղքատանա), առանց աղմուկ-աղաղակի, քրիստոնեաբար թաղել պատժիչներին, բայց չէ՜, որոշել է միավորել կիևցիներին մարդկային արժեքների տեսակետից այդքան կարևոր գործի համար։ Փա՜ռք Վիտալիին։

Սակայն հարց է ծագում. ինչո՞ւ Կիևի իշխանությունները չեն կարող բյուջեից փող հատկացնել իրենց իսկ հերոսներին թաղելու համար, որոնք, ի դեպ, զոհվել են հանուն Ուկրաինայի ամբողջականության պահպանման։ Ըստ Նովիցկու, իշխանությունն օրինական հիմունքներով չի կարող թաղել նրանց այն պատճառով, որ հակաահաբեկչական գործողությունների մասնակիցների կարգավիճակը կարգավորված չէ։ «Այսօր հակաահաբեկչական գործողության մասնակցի կարգավիճակը դեռևս հավասարեցված չէ մարտական գործողությունների մասնակցի կարգավիճակին (թեև Ուկրաինայի սոցիալական քաղաքականության նախարարությունը հակառակն է պնդում- հեղ.), ինչն էլ իրավական հիմքեր է տալիս անվճար թաղման համար։ Ցավոք, այդ կարգավիճակի անորոշությունն առաջ է բերում հետագա սոցիալական խնդիրներ զոհվածի ընտանիքի համար։ Ուստի, այդ հարցը պետք է անհապաղ լուծվի կենտրոնական մակարդակով»,- բացատրել է նա։

Չինովնիկի բերանով ճշմարտությունն է բարբառում։ Փորձենք ավելի պարզ ասել։ Եթե հակաահաբեկչական գործողության մասնակիցների կարգավիճակը հավասարեցված չէ մարտական գործողությունների մասնակցի կարգավիճակին, նշանակում է՝ պատժիչները պարզապես զինված ավազակային խմբավորումների անդամներ են, հետևաբար՝ նրանց պետք է թաղեն հարազատները։ Գուցե դա համապատասխանում է օրենքի տառին, բայց միանշանակ լկտիություն է։

Միևնույն ժամանակ, պետդեպարտամենտի տնօրենը հավաստիացրել է, որ Կիևի իշխանությունը ոչ մի դեպքում փորձանքի մեջ չի թողնի զոհված կիևցիների ընտանիքներին։ Այ քեզ ուրախություն, ի՞նչ է՝ նորի՞ց բոլորից փող են հավաքելու։

«Մայրաքաղաքի բյուջեում դրա համար միջոցներ չկան, քանի որ ոչ ոք չէր կարող կանխատեսել նման իրավիճակ։ Բայց Կիևի քաղաքային պետական վարչությունն այսուհետ ևս ամեն բան կանի, որպեսզի արժանիորեն վերջին հրաժեշտ կազմակերպի հակաահաբեկչական գործողությունների ժամանակ զոհվածներին»,- խոստացել է Նովիցկին։

Ի՞նչ արժանավոր վերջին հրաժեշտի մասին է խոսքը, եթե կիևյան խունտան առհասարակ չգիտի, թե ինչ է արժանապատվությունը։ Բայց ինչ կարող ես անել, եթե ծախսերի մեջ նման սյունակ չկա։ Ներողամիտ լինենք։ Իսկ պատժիչներն այսուհետ ևս կարող են մեռնել (կամ չմեռնել՝ իրենց գործն է) հանգիստ։ Չեն թողնի, որ փտեն ու կթաղեն, քանզի հակառակ դեպքում դա հղի է համաճարակների բռնկմամբ։